Hazarda “Dragon Oýl(Türkmenistan) Ltd” kompaniýasynyň Kubogyny almak ugrundaky V bäsleşigiň çäklerinde geçirilýän kiçi ýaşlar spartakiadasy görnüşindäki bäsleşik Hazar şäheriniň sport mnekdebiniň woleýbol toparlarynyň jemleýji duşuşyklary bilen tamamlandy. 2010-njy ýylda hebitgazçykarýan kompaniýasy bilen Hazar şäher sport komiteti bilen bilelikde başy başlanan bu wekilçilikli bäsleşik sportuň dürli görnüşleri boýunça her ýylda şäheriň açyk birinjiligi derejesinde geçirilýär.


Sport oýunlary kiçi futbol boýunça geçirilýän bäsleşikler bilen açyldy. Oňa Aşgabat şäheriniň, Balkan welaýatynyň şäherleriniň we etraplarynyň futbolçylary gatnaşdylar. Gyzykly geçen duşuşyklarda paýtagtyň olimpiýa rezerwleri mekdebiniň topary ýeňiş gazanmagy başardy. Ikinji orny Hazar şäheriniň, üçünji orny Gumdag şäheriniň futbolçylary eýelemegi başardylar.

Futbolçylaryň bäsleşiginiň yzysüre “Dragon Oýl” kompaniýasynyň kubogyny almak ugrundaky bäsleşige Aşgabadyň, Balkanabadyň, Daşoguzyň, Marynyň, Türkmenbaşynyň we Hazaryň basketbolçylary çykdylar. Çekeleşikli geçen bäsleşiklerde ýer eýeleri gürrüňsiz öňde bolmagy başardylar. Ikinji we üçünji orunlary degişlilikde Marynyň we Balkanabadyň toparlary eýelediler.


Hazar şäheriniň bedenterbiýe-sagaldyş merkeziniň boks meýdançasynda hem gyzykly sport bäsleşigi geçirildi. Bäsleşiklerde ýer eýeleri bilen bir hatarda Balkanabatly, Gumdagly, Serdarly, Türkmenbaşyly we Hazarly boksçylar bäsleşdiler. Bu bäsleşiklere tomaşa etmek üçin dürli ýaşdaky tomaşaçylar geldiler. Hzarly boksçylaryň jemleýji duşuşykda gazanan üstünlikleri olara umumytopar hasabynda üstünlik getirdi. Ikinji orny Balkanabatly, üçünji orny Serdar şäheriniň boksçylary eýelediler.

Boks bäsleşiginiň ýapylyşy “Drago Oýl” Kubogyny almak ugrundaky oýnuň ýeňijilerini we baýrakçylaryny sylaglamak dabarasy bilen tamamlandy. Olara goja Hazaryň kenarynda bu bäsleşikleri guraýjylar tarapyndan dabaraly ýagdaýda Hormat hatlary we ýadigärlik sowgatlary gowşuryldy.