Paýtagtyň “Aşgabat” kinokonsert merkezinde “Olar Watan üçin söweşdiler” ady bilen dürli ýaşdaky nesilleriň duşuşygy geçirildi. Türkmenistanyň Medeniýet ministrligi we Kinematografiýaçylar birleşmesi bu duşuşygyň guramaçylary bolup çykyş etdiler. Bu ýere ýygnanlar öz kärdeşlerini – frontçy aktýorlary – köpleriň söýgüli artistlerini ýatladylar. Durdy Saparow, Sary Garryýew, Şükür Kulyýew dagy urşa meýletin gidip, uly ýeňiş gazanyp Watana aman-sag dolanyp geldiler. Olar öz ömürlerini kinosungatyna hyzmat etmäge bagyşladylar.

Türkmen meşhur režissýorlary K.Halmämmedowyň, I.Bekmiýewiň ýurduň kinosynyň parlak ýyldyzlary barada beren gürrüňleri artistleriň gatnaşan filmlerinden parçalar bilen utgaşdyryldy. Çagalar üçin niýetlenen K.Halmämmedowyň “Ogul”, “Ynha kakam gaýdyp geler” atly kinofilmleri köpleriň ýadyndadyr. Bu filmleriň her biri uruş temasyna ýüzlenýär. Bu filmleriň üstünde işlemek bilen, režissýor beýik watansöýüjilik duýgusy barada gürrüň berýär, bu duýgy, ýeňşe bolan beýik ynam frontçy artistleriň ählisiniň kalbynda doludy.

Türkmen döwlet medeniýet institutynyň talyplary tarapyndan taýýarlanan konsert programmasy duşuşyga gatnaşyjylar tarapyndan gyzgyn garşylandy. “Watana bagyşlanýar” edebi-sazly kompozisiýa bu konsertde esasy orny eýeledi. Türkmenistanyň at gazanan medeniýet işgäri G.Hümmedowyň ählihalk tarapyndan söýülýän frontçy artistler barada beren gürrüňleri şatlykly we gül çemenleri bilen garşylandy. Duşuşyk frontçy esgerleriň gatnaşmagynda döredilen “Döwranyň başdan geçirenleri” atly film bilen tamamlandy.