“Saglyk we bagtyýarlyk” şygary astynda geçirilýän bedenterbiýe-sport we medeni sagaldyş çäreleri batly depginde dowam edýär. Geçen hepdäniň dynç günleri Olimpiýa şäherjigi 1000-den gowrak talybyň gatnaşmagynda giň göwrümli çäräniň merkezine öwrüldi. Ol ýerde talyplar açyk howada önümçilik maşklaryny geçirdiler. Paýtagtymyzyň “Galkynyş” sport toplumynda hindi toparlaýyn oýny kabaddi boýunça Türkmenistanyň çemiponatynyň final duşuşyklary geçirildi.


Köpçülikleýin sagaldyş çäresi 15 müň tomaşaça niýetlenen orunly, köpugurly sport toplumynyň öňündäki giň meýdançada geçirildi. Ýurdumyzyň ýokary okuw mekdepleriniň 16-syna wekilçilik edýän talyplaryň köpüsi geljek ýyl Ýapyk binalarda we söweş sungaty boýunça V Aziýa oýunlarynda işlemeli meýletinçilerden ybarat boldy.



... Kabaddi boýunça ýurdumyzyň çempionaty Ahal, Mary, Daşoguz welaýatlaryndan we Aşgabat şäherinden erkekler we zenanlar ýygyndy toparlaryny özünde jemledi. “Aýterek-günterek” türkmen milli oýnuny ýada salýan bu hindi oýnunda paýtagtly türgenler özleriniň ussatlygyny görkezip, iki toparda hem altyn medallary eýelediler.

Kabaddiniň müňýyllyk ösüş taryhy bar. Ol söweş sungatlaryna deň saýylýar. Oýnuň düzgünine laýyklykda, söweş we göreş usullaryny ulanmaga rugsat edilýär. 1990-njy ýyldan bäri nusgawy tomusky yklym oýunlarynyň sanawyna kabaddiniň girizilmegi bu oýnuň Aziýada örän meşhurlygyndan habar berýär.



Aprel aýyň 13-inden-19-na çenli kabaddi boýunça Aziýanyň birinjiligi ugrunda ýaryş Eýranyň Urmiýa şäherinde geçirilýär. Ol ýaryşa biziň ýaşlar ýygyndy toparymyz gatnaşar. Biziň erkekler ýygyndy toparymyz häzirki döwürde yklym derejesinde geçiriljek jogapkärli ýaryşa ykjam taýýarlyk görýär. Bu ýaryş aprel aýynyň 25-inden maý aýynyň 1-ine çenli Pakistanyň paýtagty Yslamabat şäherinde geçiriler.