Ýaş skripkaçylar ansambly Türkmenistanyň demirgazyk sebitinde geçirilýän dürli medeni çärelere işjeň gatnaşýar. Daşoguz welaýatynyň çagalar sungat mekdebiniň dürli synplarynda okaýan çagalaryň birleşen toparyna hormatly wezipe—sebitde geçirilýän çäreleriň myhmanlarynyň öňünde çykyş etmek ynanylýar. Ýaş skripkaçylar 2016-njy ýylda Daşoguzyň GDA-nyň medeni paýtagty derejesiniň berilmeginiň çäklerinde gurnalan çärelere gatnaşypdylar. 2017-nji ýylda Daşoguzda geçirilen bilelikdäki döredijilik çäresine gatnaşan özbek medeniýetiniň wekilleri-de ansamblyň agzalarynyň ýerine ýetirijilik ussatlygyna ýokary baha beripdiler. Zehinli çagalar toparynyň repertuarynda tanymal türkmen we daşary ýurt kompozitorlarynyň eserleri bar.

Skripka çalmak ussatlygyny kämilleşdirmek Daşoguzyň welaýat çagalar sungat mekdebiniň işiniň esasy ugurlarynyň biridir, bu ýerde çagalaryň üç ýüzden gowragy fortepianoda, kirişli we halk saz gurallarynda saz çalmagy, aýdym aýtmagy we tans etmegi öwrenýärler. Olardan iň zehinlileri we erjelleri mekdebiň birleşdirilen hor, skripkaçylar ýa-da bagşylar ansambly ýaly döredijilik toparlaryna gatnaşýarlar.

Ýokary düşünjeli, ruhy we beden taýdan ösen ýaş nesli terbiýelemek üçin zerur şertleriň döredilmegi –döwlet syýasatynyň ileri tutulýan ugurlarynyň biridir. Daşoguz welaýatynda bilim berýän we ýaş nesle türkmen halkyna mahsus estetiki gymmatlyklary öwretmeklige ýardam edýän umumy bilim berýän mekdeplerden başga-da, ýörüteleşdirilen mekdepleriň dördüsi, şol sanda M. Garlyýew adyndaky sungat mekdebi we medeniýet ulgamynyň beýleki bilim edaralary, şeýle hem kitaphanalar, muzeýler, teatrlar işleýär.