Aýgül ýurdumyzda giňden tanalýan sazanda, halkara bäsleşikleriniň diplomanty Stella Faramazowanyň okuwçysy. Halypasynyň aýtmagyna görä, Aýgül onuň iň gowy şägirtleriniň biri, mugallymy onuň fortepianoda saz çalmak ussatlgyny kämilleşdirip, uly üstünliklere ýetjekdigine ynam bildirýär.

Aýgül Mähri Agajykowa (skripkada), soňra Faruh Myradow (skripkada) bilen ikilikde Iogannes Bramsyň 2-nji Sonatasynyň birinji we üçünji böleklerini ýerine ýetirdi. Fortepiano we skripka frazalarynyň ýeňil owazlary bu esere mahsus şahyranalygy beýan etdi. Tomaşaçylar ýaş sazandalaryň zehinli çykyşyna gowy baha berdiler.

Wokal sungatynyň ussatlary, konserwatoriýanyň mugallymlary – Türkmenistanyň halk artisti Gülnar Nuryýewa (soprano) bilen Türkmenistanyň at gazanan artisti Yslam Jumaýew (tenor) ýaş pianinoçyny goldamaga geldiler. Aýgüliň fortapianoda sazandarlyk etmeginde Antonio Wiwaldiniň «Ýeňiji Ýudif» oratoriýasyndan ariýa, Sergeý Rahmaninowyň «Çižiň ölümine bagyşlap» romansy, Fernando Obradosyň «Zenan häsiýeti» ispan aýdymy, Nury Halmämmedowyň «Hirosimanyň we Nagasakiniň çagalarynyň diňläp ýetişmedik aýdymlary» wokal tapgyryndan «Sarybilbil» aýdymy ýaňlandy. Eserleriň her biri şowhunly el çarpmalar bilen garşylandy.

Konsertiň ahyrynda Gülnar Nuryýewa we Yslam Jumaýew Pýotr Çaýkowskiniň «Ýewgeniý Onegin» operasyndan Ýewgeniniň hem-de Tatýananyň ahyrky özara düşünişmelerini ýerine ýetirip, diňeýjjileri ajaýyp wokaly, keşpleri dörediş ussatlygy bilen özüne bendi etdiler.

Aýgül Silgeldiýewanyň şowly ilkinji çykyşy ýaş pianinoçyda, konserte gatnaşanlaryň ählisinde we tomaşaçylarda täsin duýgylary döretdi, şeýle hem onuň halypasy Stella Faramazowa üçin ajaýyp sowgat boldy.