Men sergi bilen tanyşlygy art-deko usulynda döredilen natýurmortlardan başladym. Olary awtorlary – Angelina Kalinina bilen Göwher Şeripowa türkmen halkynyň myhmansöýerliginiň nyşany bolan çaý içişlik temasyny saýlap alypdyrlar. Kreatiw şekillendirş tilsimine garamazdan, eserleriň millilige ýugrulandygyny ýordumlarydyr doýgun reňkelri hem görkezýär.
Esen Kömekow tamdyra çörek ýapýan zenanyň keşbini kiçi heýkeltaraşlyk usulynda özboluşly beýan edipdir.
-Men bu işi bir ýyllap taýýarladym, zenan maşgaladan üýtgeşik başarnygy talap edýän bu güzaply işiň ähli ugurlaryny öwrenmek üçin ençeme sagatlap olaryň işine syn etdim. Geljekki işiň çyzgylarynyň ençemesini taýýarladym – diýip Esen gürrüň berdi.
Çörek – mukaddeslik. Tamdyry gözden-dilden goramak üçin oňa goçak nagşyny salýarlar. Menem heýkelden ýasan tamdyryma goçak nagşyny saldym. Umuman, çörek bilen baglanşykly yrym kän. Men öz işimde milli ýörelgelerimize eýerýän enelerimize we mamalarymyza hormat-sarpamy beýan etmek isledim.
Bäşim Nuraly adyndaky çagalar çeperçilik mekdebiniň halyçylyk bölüminiň okuwçysy Oguljeren Durdyýewa köne nusga horjun görkezdi, onuň ýazgysyna ol «Şamar» diýen türkmen halk ertkeisinde duşupdyr.
2-nji çagalar çeperçilik mekdebiniň okuwçylary surat salnan keramik gaplaryň bäşisini sergä hödürläpdirler. Pagtagözel Ýagşymyradowa işini kürte nagyşlary bilen bezäpdir. Onuň synpdaşy Ogulgözel Garagoçowa milli keşdeler bilen bezelen toýun gapda türkmen gözeliniň keşbini çekipdir.
Arzuwçyl Bägül Gubaýewa «Älem» atly işinde älem hemrasynyň penjiresinden açyk älemde işläp ýören kosmonawtlaryň dördüsini şekillendiripdir. Röwşen Saparow bolsa öz işini gaz çykaryjylara bagyşlapdyr.
Berdimyrat Ahmedow Beýik Ýeňşiň gahrymanlarynyň edermenligini wasp edýär. Elbetde, sergide söwer paýtagtymyz – ak mermer Aşgabadymyza, onuň ajaýyp binalaryna we gözel çüwdürim-seýilgäh zolaklaryna bagyşlanan işler kän.
Paýtagtymzyň Medeniýet müdirliginiň ýardam bermeginde guralan sergi Aşgabat şäheriniň gününe çagalar döredijiliginiň kreatiw we ýagşy röwüşleri bilen bezelen ajaýyp sowgady boldy.
