Gök ekinleri taýýarlamak möwsümi başlandy. Ahal wlaýatynyň Ak bugdaý etrabynda ýerleşýän zawodda her gün sekiz tonna çenli marinada ýatyrylan önüm aýna gaplara gaplanylýar. «Mylaýym» söwda nyşany bilen hem gaplanylan gök ekinler çykarylar.
Kompaniýa alyjylara uzak möhletleýin saklanylýan önümleriň ýigrimiden gowrak görnüşini: ýerli oba hojalyk önümlerinden taýýarlanan marinada ýatyrylan hyýarlary we pomidorlary, badamjan ikrasyny, souslary, pastalary, miwe mürepbelerini teklip eder.
Ak bugdaý etrabynda ýerleşýän «Bakja söwda» husysy kärhanasy täze önümiň ilkinji tapgyryny – marinada ýatyrylan, banka gaplanylan kömelekleriň 20 müňden gowragyny çykardy.
«Bakja söwda» HK – hamyrdan ýarym fabrikatlary, şeýle hem doňdurmalary öndürýän ýurtda tanalýan kärhanadyr. Kärhananyň düzüminde maldarçylyk fermasy hem bar, bu bolsa arassa sygyr süýdünden ýokary hilli önüm çykarmaga mümkinçilik berýär.
Telekeçiler iki ýyl mundan ozal gaplanan gök ekinleri we miweleri çykramagy özleşdirdiler. Olaryň arasynda miwe şerbetleri, marinada ýarylan we öz suwuna gaýnadylan pomidorlar, duzlanan hyýarlar, gök ekin işdäaçarlary, leço bar. Şu ýyl bolsa täze önüm – içi kärhanada öndürilen ýertudana we wişnýa mürepbeli doňdurma çykarylyp başlandy.
«Aýly ýaz» hojalyk jemgyýeti hem miweleri we iýmişleri gaýtadan işlemegi özleşdirdi. Şu ýylky möwsümde «TERI» söwda belgisi bilen bir miweli şerbetler, şeýle hem aýna gaba gaplanylan dürli miwelerden assorti çykarylar.
Daşoguzyň ozalky tomat-konserwa zawodynda telekeçiler pomidor pastasyny, şireleri, mürepbeleri, şerbetleri, marinda ýatyrylan gök miweleri we üwmeç öndürýän önümçilik bölekleriniň dördüsini işe girizdiler. Olar paýtagtyň dükanlarynda satylýar.
Kärhanada möwsümde 300 tonna golaý himiki goşundysyz we ys berijisiz gaplanylan önüm çykarmagy göz öňünde tutýarlar. Taýýarlamakdan we gaplamaga çenli önümçiligiň ähli tapgyrynda hil barlagy ýola goýlan. Önümiň bi bölegi eksporta ugradylar.
