Aşgabadyň geçmişi bilen häzirki döwri sazlaşykly utgaşýan asuda künjekleriniň birinde türkmen nakgaşlarynyň ussahanalary ýerleşýär. Biz olaryň birinde – Oguljeren Atageldiýewna Babaýewanyň ussahanasynda myhmançylykda bolduk.
Oguljeren döredijilik adamlarynyň maşgalasyndan: onuň kakasy Atageldi Nurmämmedow Mollanepes adyndaky Türkmen Döwlet akademiki teatrynda işläpdi, ejesi tansçydy, ýöne ol kärini taşlap, özüni maşgalasyna bagyş edýär.
Oguljereni kakasy repetisiýalara alyp giderdi, olam aktrisa bolmagyň arzuwyndady.
12 ýaşynda çynlakaý surat çekip ugrandan soň onda saz ukybam ýüze çykdy. Sungat äleminde tanşan ata-enesi gyzjagazyň döredijilik başlangyçlaryny hemmetaraplaýyn goldadylar.
Ejesi Mahym Nurmämmedowanyň maslahaty bilen ünsüni žiwopise gönükdirdi. Babaýewa realizm bilen çeper hyýaly, reňkleri we kompozision gurluşy batyrgaý utgaşdyryp, şol döwürde-de öz usulyny döredipdi.
16 ýaşynda Türkmen döwlet çeperçilik uçilişşesine okuwa girýär. 4-nji ýyl talyby wagty režisýor Baba Annanow ony «Kärizgenler» filmine surata düşmäge çagyrýar. Ýöne Oguljeren Türkmenistanyň halk nakgaşy Durdy Baýramowdan tälim almaga mynasyp bolan uçurym dört gyzyň biri bolany üçin, kinofilme surat düşmekden ýüz dönderdi.
1979-1984-nji ýyllarda bu ussatdan sapak alyp ýörkä ýurdumyzyň ähli ýerine baryp gördi. Aýratynam binagärlik ýadygärlikleri we özboluşly ösümlikler onda üýtgeşik täsir galdyrypdy.
Şol döwürde Babaýewanyň eserleri respublikan we halkara sergilerinde görkezilýär. Gomeriň poemalarynyň, Samuil Marşagyň kitaplarynyň surat bezegleriniň, 1978-nji ýylda çykan «Garfika» atly kitabyň awtory, tanymal grafik Dmitriý Basti Baýramowyň şägitleri-gyzlaryň suratlarynyň liniýalarynyň takyklygyny we nepisligini belläpdi.
Ussadyň öwgüsi onuň 1984-nji ýylda Moskwanyň poligrafiýa institutyna okuwa girmegine sebäp boldy. Kitap bezegi sungatyny we möçberli grafikany öwrenmegi ýüregine düwen Oguljeren beýik nakgaş Wiktor Wasnesowyň neberesi Andreý Wasnesowdan we Larisa Kopylowadan sapak alýar.
Türkmenistan Garaşsyzlygyny alandan soň Oguljeren köp wagtlap okuw kitaplarynyň we çagalar üçin kitaplaryň surat bezegini ýerine ýetirdi.
2005-nji ýylda Babaýewanyň ilkinji özbaşdak sergisi boldy, 2009-njy ýylda bolsa ol Türkmenistanyň Prezidentiniň döredijilik işgärleriniň arasyndaky «Türkmeniň Altyn asyry» bäsleşiginiň baýragyna mynasyp boldy.
Oguljeren tebigatdan, Türkmenistanyň taryhyndan, däplerinden we binagärlik ýadygärliklerinden ylham alýar.
2018-nji ýylda nakgaşyň grafiki işleriniň 16-sy Şwesiýada geçirilen abraýly halkara sergisinde, 2020-nji ýylda onuň eserleri ABŞ-nyň Kaliforniýa ştatynda art-galareýalarda we Russiýada Sankt-Peterburgda geçirilen onlaýn-taslamasynda görkezildi.
Şu günler Babaýewa Aşgabadyň 140 ýyllygyna bagyşlap «Hiňňildik» we milli toý dabarasy barada »Kejebe» suratyny taýýarlaýar.
Roman TEPLÝAKOW
Surata düşüren: Wýaçeslaw SARKISÝAN
