«Arkadag» toparynyň futbolçylary Nižnyý Nowgorodyň «Pari NN» klubyndan 2:1 hasabynda üstün çykdy. Oýun Abu-Dabide (BAE) geçirildi, bu ýerde Wladimir Baýramowyň topary 4-nji martda başlaýan Türkmenistanyň çempionatyna taýýarlanýarlar.
21-nji minutda «Pari NN»-iň hüjümçisi Nikoloz Kutateladze hasaby açdy. Şondan bary-ýogy iki minut soň Begmyrat Baýow hasaby deňledi. «Arkadag» toparynyň iň köp pökgi geçiren oýunçysy Didar Durdyýew 68-nji minutda 11 metrlik jerime urgusyny dürs urup, türkmen toparyna ýeňiş getirdi.
18 tapgyrdan soň 24 utuk bilen Russiýanyň premýer-ligasynda 9-njy orny eýelän, Russiýanyň milli ýygyndysynyň ozalky meşhur oýunçysy Sergeý Ýuranyň tälim berýän «Pari NN» kluby möwsümden öňki taýýarlykda «Arkadag» toparyna gowy bäsdeş boldy.
Şondan öň türkmen kluby Türkiýäniň Antalýa şäherinde geçirilen birinji türgenleşikde ýoldaşlyk duşuşyklarynyň üçüsini geçirdi. Birinji oýunda ol Demirgazyk Makedoniýanyň abraýly «Wardar» klubyny 1:0 hasabynda utdy, ondan soňky iki duşuşykda Ukrainanyň «Şahtýoryndan» 1:4 we «Dnepr-1» klubyndan 0:1 hasabynda ýeňildi.
Abu Dabidäki ikinji türgenleşik ýygnanşygynda «Arkadag» topary Sankt-Peterburgdan häzirki Russiýanyň çempiony «Zenit» we Gyrgyzystanyň häzirki iki gezek çempiony we Naýbaşy kubogynyň ýeňijisi Kantdan «Abdyş-Ata» duşuşmagy meýilleşdirýär.
Hatarynda Türkmenistanyň milli ýygyndysynyň esasy oýunçylary çykyş edýän «Arkadag» futbol topary 2023-nji ýylyň aprelinde döredilip, ol eýýäm milli çempionatda çykyş eden ilkinji ýylynda çempion boldy we ýurdumyzyň Kubogyny eýeledi. Türkmenistanyň 2023-nji ýylky çempionatynda döwlet derejeli şäheriň adybir topary 24 resmi oýnuň hemmesinde ýeňiş gazandy we ähmiýeti boýunça ikinji derejeli baýrak ugrunda oýunda Kubogyň öňki eýesi, AFK çempionlar ligasyna iki gezek gatnaşan «Ahal» toparyndan 3:0 hasabynda üstün çykdy.
Täze möwsümde «Arkadag» çempionlygyny saklap galmaga taýýarlanýar.
