Türkmenistanyň ýetginjekler milli ýygyndy toparynyň hokkeýçileri dört toparyň gatnaşmagynda Keýptaunda (GAR) geçirilen 18 ýaşa çenli oýunçylaryň arasynda ýetginjekler dünýä çempionatynyň «B» toparynyň üçünji diwzionynda kümüş medal gazandylar.
Baýrakly orunlary eýelänler we indiki ýyl üçünji diwizionyň ýokary derejeli «A» toparynyň dünýä çempionatynda çykyş etmäge hukukly ýeňiji ýaryşyň soňky güni aýan boldy. Soňky tapgyrdan öň «B» toparda Gonkongyň (6 utuk) we ondan 3 utuk az toplan Türkmenistanyň we Tailandyň ýygyndylary birinji orna dalaşgärdiler.
Birinji oýunda Tailandyň ýygyndysy garaşylmadyk ýagdaýda Gonkongyň ýeňlişsiz çykyş edip gelýän toparyny 3:1 (1:1, 1:0, 1:0) hasabynda utdy. Olaryň yzysüre Türkmenistanyň we GAR-yň hokkeýçileri güýç synanyşdylar. Bu oýundan öň türkmenistanlylar Tailandyň toparyny 7:2 hasabynda ýeňdiler, Gonkongyň toparyndanam 3:8 hasabynda ýeňildi. Meýdança eýeleri Günorta afrikalylar iki oýunda-da uly hasap bilen – Gonkongdan – 1:11 we Tailanddan – 2:12 hasabynda ýeňlişe sezewar boldy.
Duşuşygyň 9-njy minudynda Allan Muhyýew hasaby açdy. Ikinji döwrüň 44-nji sekundynda Duwan wan der Merwe oýunçy artykmaçlygyndan peýdalanyp, hasaby deňledi – 1:1.
24-nji minudyň ahyrynda derwezeban bilen ýekeme-ýeke çykan Soltanhamit Wahitow Türkmenistanyň toparyny öňe çykardy – 2:1. Üç minutdan soň GAR-yň iki hokkeýçisi toparymyzyň bir goragçynyň garşysyna çykdy we Naom Lewin hasaby deňledi – 2:2.
Duşuşygyň 33-nji minudynda Guwanç Jepbarowyň şägirtleri oýunçy artyklygyndan peýdalanyp, ýene öňe saýlandylar. Şöhrat Begliýew Alihan Aliskerowyň beren şaýbasyny dürs urup, GAR-yň toparynyň derwezesine saldy.
Soňky döwürde diňe türkmen hokkeýçileri gol saldy. Ilki bilen, Daýanç Batyrow meýdançadan çykarylyp, azlykda galsalaram şaýba salmagy başardylar. 42-nji minutda Allan Muhyýew türkmen toparynyň artykmaçlygyny 4:2-ä ýetirdi. Soň bolsa Isgenderhan Durdyýew 47-nji minutda we oýnuň gutarmagyna 28 sekunt galanda iki şaýba geçirip, oýny 6:2 hasabynda Türkmenistanyň toparynyň peýdasyna tamamlady.
Oýundan soň eminler oýnuň iň gowy oýunçylaryny kesgitlediler. Olar GAR-yň milli ýygyndysyndan – goragçy Daýýan Kamiş we Türkmenistanyň toparyndan – kapitan Allan Muhyýew. Ýaryşyň iň gowy derwezeçisi Maýkl Si Kam Gan (Gonkong), goragçysy Man Hin Tommi Kut (Gonkong), hüjümçisi Tananutç Kultanthorn (Tailand) diýlip yglan edildi.
Ýaryşda Gonkongyň, Türkmenistanyň we Tailandyň toparlarynyň hersi 6 utuk toplady. Şeýle bolsa-da, bu toparlaryň arasyndaky iň oňat gol tapawudyna görä, birinji orny we «A» topara ýeke-täk hukugy 2014-nji ýylda «B» toparda ilkinji gezek çykyş edip başlan gonkongly ýetginjekler eýelediler.
Ýetginjekler dünýä çempionatynda (U18) ilkinji gezek çykyş eden türkmen hokkeýçileri ikinji orna munasyp boldular, olar indi 2025-nji ýylda ýene-de üçünji diwizionyň «B» toparynda oýnarlar.
Baýrak gowşurylyş dabarasynda Türkmenistanyň topary 2024-nji ýylda ýetginjekler dünýä çempionatynyň «B» toparynyň üçünji diwizionynda 2-nji ýer üçin kümüş medal we ýadygärlik baýrak bilen sylaglandy.
Ýetginjekler dünýä çempionatynda (U18) Türkmenistan milli ýygyndysyna Içeri işler ministrliginiň «Galkan», Söwda we daşary ykdysady gatnaşyklar ministrliginiň «Şir» we «Türkmengaz» Döwlet konserniniň «Oguzhan» toparlaryndan ýaş hokkeýçileriň 20-si wekilçilik edýär.
Bürünç medallary bassyr ikinji ýyl tailandly ýetginjekler eýelediler. GAR-yň hokkeýçileri bolsa bassyr üçünji ýyl soňky orny eýelediler.
