Bişkekde geçirilýän dünýä çempionatynyň «A» toparynyň üçünji bölüminde Türkmenistanyň ýygyndy toparynyň hokkeýçileri ilkinji ýeňşi gazandy. Bäsleşigiň ikinji tapgyrynda ildeşlerimiz Günorta Afrikanyň ýygyndy toparyny 4:3 hasabynda utmagy başardy.
Toparlar ýaryşa dürlüçe başlady: birinji tapgyrda Günorta Afrikanyň topary Meksikanyň ýygyndy toparyny 6:3 (3:1, 1:2, 2:0) hasabynda utdy, türkmenistanly hokkeýçiler bolsa azlykda oýnalan soňky minutda aýgytly şaýbany goýbermek bilen, lýuksemburgly garşydaşlaryndan 3:4 (0:2, 2:0, 1:2) hasabynda utuldy. Şonuň üçin-de olaryň arasyndaky başa-baş duşuşyk möhüm ähmiýete eýedi.
Ondan öň Türkmenistanyň we Günorta Afrikanyň hokkeý toparlary milli ýygyndy topar derejesinde dünýä çempionatynda iki gezek duşuşypdy. 2019-njy ýylda Sofiýada geçirilen dünýä çempionatynda türkmen topary ýeňşi baýram edipdi – 7:2, geçen ýyl bolsa günorta afrikalylar öz ýurtlarynda geçen dünýä çempionatynda haklaşdylar – 9:6.
Bäsdeşleriň üçünji duşuşygynda 2-nji minudyň ahyrynda Arslan Nuryýew hasaby açdy. Üç minutdan soň Erkin Kakabaýew üstünligi iki esse artdyrdy. 14-nji minutda Žan-Mişel van Dusburg bir jogap şaýbasyny saldy we toparlar hasap Türkmenistanyň milli ýygyndysynyň peýdasyna 2:1-kä birinji arakesmä çykdylar.
25-nji minudyň ahyrynda Arslan Nuryýew ýene bir gol geçirip, artykmaçlygy iki şaýba çenli artdyrdy – 3:1. Emma 31-nji minutda Žan-Mişel van Dusburg hem ýene bir şaýbany tora saldy we aratapawudy az ýagdaýa getirdi – 2:3.
Jemleýji döwürde toparlar bir, ýagny 42-nji minutda birek-birege gol saldylar: Begenç Döwletmyradowyň şaýbasyna Hoakima Waladasa takyk urgy bilen jogap berdi.
Duşuşygyň iň gowy oýunçylary diýlip Türkmenistanyň toparyndan derwezeçi Kerimli Çaryýew, Günorta Afrikanyň toparyndan bolsa hüjümçi Žan-Mişel van Dusburg ykrar edildi.
Duşuşyk tamamlanandan soň, biziň hokkeýçilerimiziň ýeňşiniň şanyna Gyrgyzystanyň paýtagtyndaky «Şäheriň buzly depesiniň» sahnasynyň astynda Türkmenistanyň senasy ýaňlandy.
Bişkekde geçýän dünýä çempionatynda «B» toparyň has güýçli ikinji bölümine geçmäge hukuk almak üçin alty topar bäsleşýär: Gyrgyzystan, Lýuksemburg, Meksika, Taýland, Türkmenistan we Günorta Afrika.
Ilkinji iki tapgyryň galan duşuşyklarynyň netijeleri: Gyrgyzystan – Taýland: 4:9 (2:1, 1:3, 1:5), Meksika – Taýland: 0:5 (0:2,0:1,0:2), Lýuksemburg – Gyrgyzystan: 3:7 (0:3, 1:2, 2:2).
Şeýlelik bilen, iki tapgyrdan soň çempionatda Taýlandyň topary 100% görkeziji (6 utuk) bilen öňde barýar. Günorta Afrikanyň, Türkmenistanyň, Gyrgyzystanyň we Lýuksemburgyň toparlarynyň hersi 3 utuk toplady. Ýaryş jedweliniň ahyrynda entek utuk gazanmadyk Meksikanyň hokkeýçileri ýerleşýär.
Baýram Allaýarowyň şägirtleri indiki tapgyrda Gyrgyzystanyň topary bilen oýnar.
Bişkekde geçýän dünýä çempionatynda Türkmenistanyň ýygyndy toparynda 20 hokkeýçi oýnaýar, olaryň 18-si Içeri işler ministrliginiň «Galkan» toparyndan, 2-si Söwda we daşary ykdysady gatnaşyklar ministrliginiň «Şir» toparyndan.
