Rigada (Latwiýa) tamamlanan Ýewropa Kubogy ugrunda ýaryşda türkmen dzýudoçysy Serdar Rahymow kümüş medal eýeledi, dört yklymyň 26 ýurdundan 316 (214 erkek we 102 zenan) türgenleri iki günüň dowamynda 14 baýrak toplumy almak üçin bäsleşdiler.
Türkmen döwlet binagärlik-gurluşyk institutynyň 2-nji ýyl talyby Serdar Rahymow 66 kilograma çenli agram derejesinde şeýle üstünlik gazandy, ýaryşda 37 ýurtdan 46 türgen iň güýçli ady almak üçin tutluşdy.
20 ýaşly ildeşimiz üstünlik ýolunda bäş ýeňiş gazandy. Birinji aýlawda Serdar garşydaşyndan üçünji duýduryş («hansoku-make») boýunça Gaý Gutmany (Ysraýyl) ýeňdi. Soňky üç tutluşykda Joşua Bellden (Beýik Britaniýa), Gipwanni Suares Artilesden (Ispaniýa) we Luka Çoplianiden (Gruziýa) «ippon» bilen üstün çykdy.
Ýarym finalda S.Rahymow «waza-ari» bahanyň hasabyna 23 ýaşly Uilliam Sysikden (Fransiýa) üstün çykdy. Finalda göreşiň esasy 4 minudynda hiç kime utuk berilmänsoň, bellenilen netijeli tutluşyga çenli goşmaça söweşde («Golden skor») 2023-nji ýylda Gaýýada (Portugaliýa) geçirilen Ýewropa Kubogy ýaryşynda kümüş medal eýelän, Malagada (Ispaniýa) 2023-nji ýylda geçirilen Ýewropa Kubogy-2023 ýaryşynda bürünç medala mynasyp bolan 22 ýaşly Finli Allandan (Beýik Britaniýa) ýeňlip, ikinji ýeri eýeledi. Bürünç medallara Uilliam Sysik (Fransiýa) we Maýkl Fraýer (Beýik Britaniýa) mynasyp boldular.
Serdar Rahymow soňky iki aýda ikinji gezek iri halkara ýaryşlarynda kümüş medal eýeledi. Fewral aýynda «Warsaw European Open 2024» ýaryşynda kümüş medala mynasyp boldy. 2023-nji ýylda Rimde geçirilen Ýewropanyň açyk çempionatynda kümüş, Saraýewoda geçirilen ýetginjekleriň arasynda Ýewropanyň Kubogy ugrunda ýaryşda altyn we ýetginjekleriň arasynda Daşkentde geçirilen Aziýa Kubogy ýaryşynda kümüş medal gazandy. Warşawada geçirilen Ýewropa açyk ýaryşynda kümüş medal gazananlygy üçin Serdar 66 kilograma çenli agram derejesinde dünýä derejesinde dört dereje ýokary galyp, 1223 utuk bilen 42-nji, ýetginjekler görkezijisinde 172 utuk bilen 15-nji orna çykdy.
Serdar Rahymow Hojambazda (Lebap welaýaty) Baýram Şerapowyň elinde dzýudo bilen meşgullanyp başlady. Häzirki wagtda olar 2023-nji ýylda ýapon hünärmeni, dzýudo boýunça Kodokan ugrunda ýedinji dan derejesine ýeten Kazuhikonyň ýolbaşçylygynda Türkmenistanyň milli ýygyndysynda ussatlygyny kämilleşdirýärler.
Şol 66 kilograma çenli agram derejesinde beýleki türkmen dzýudoçysy Hekim Agamämmedow Rigada geçirilen Ýewropa Kubogy ýaryşynda bürünç medala ýetmän galdy. Ilkinji iki göreşde degişlilikde Eýden Moffaty (Beýik Britaniýa) we Dani Kaçarany (Horwatiýa) «ippon» bilen (arassa), soňra goşmaça tutluşykda («Golden skor») Teo Jialluraçisi (Fransiýa) ýeňdi.
Çärýek finalda 2023-nji ýylda Tokioda geçirilen «Uly tuwulga» ýaryşynyň 25 ýaşly bürünç medalynyň eýesi, 2024-nji ýyldaky Ýewropa Kubogynyň geljekki ýeňijisi britaniýaly Finli Allandan «ippon» boýunça utuldy. Soňra teselli ýaryşynda Georgiý Kurkoidden (Ukraina) we Mereý Marhanbetowdan (Gazagystan) arassa ýeňiş bilen üstün çykdy.
Bürünç ugrundaky bäsleşikde ýeňijini goşmaça tutluşykda kesgitlenmeli boldy, sebäbi söweşiň esasy 4 minudy utuksyz tamamlandy. «Golden skor» duşuşygynyň 26-njy sekundynda üstünlik fransuz Uilliam Sysigiň paýyna düşdi. Hekim Agamämmedow netijede bäşinji orny eýeledi.
Rigada geçirilen Ýewropa Kubogy ýaryşynda 8 türgen (5 erkek we 3 zenan) wekilçilik eden Türkmenistanyň toparyndan Gurbanaý Gurbanowa (48 kg çenli) we Zülhumar Daşgynowa (63 kg çenli) ýedinji orny eýelediler.
Türkmen dzýudoçylary Parižde geçiriljek XXXIII Olimpiýa oýunlary-2024-e gatnaşmak ugrundaky göreşde halkara wekilçilikli ýaryşlarda çykyş edip, utuk gazanmagy dowam etdirýärler. Häzirki wagtda 2024-nji ýyldaky Olimpiýa oýunlaryna gatnaşmak üçin Hekim Agamämmedowyň we Serdar Rahymowyň (ikisi hem 66 kilograma çenli agram derejesinde), şeýle hem Maýsa Perdäýewanyň (57 kg çenli) has gowy mümkinçilikleri bar, olar ýene alty saýlama ýaryşda Olimpiýa görkezijilerini gowulandyrmalydyrlar.
IJF dünýä ýaryşynyň çäklerinde 2024-nji ýylyň 22-nji martyndan 24-nji martyna çenli Tbilisiniň (Gruziýa) Olimpiýa köşgünde geçiriljek «Uly tuwulga» ýaryşy dzýudoçylarymyz üçin indiki çynlakaý synag bolar. 19–24-nji maýda Abu Dabide (BAE) geçiriljek dünýä çempionaty Pariž Olimpiýadasyna dzýudoçylary saýlamagyň soňky tapgyry bolar.
Fransiýanyň paýtagtyndaky Olimpiýa oýunlary 2024-nji ýylyň 26-njy iýulyndan 11-nji awgustyna çenli dowam eder.
