Türkmenistanyň Statistika baradaky döwlet komiteti ÝUNISEF-iň we ÝUNFPA-nyň goldawy bilen, Türkmenistanda köp görkezijili toparlaýyn barlag (MICS7) geçirmek boýunça meýdan işlerini üstünlikli tamamlady. 2024-nji ýylyň ýanwar aýyndan bäri geçen bu barlagyň çäginde jemi 6800 hojalyga barlyp görüldi.
Lebap welaýatynyň Köýtendag etrabynyň Çarşaňňy obasyndaky iň soňky toparyň derňewi bilen bu sebitde we tutuş ýurtda uly göwrümli maglumat ýygnamak işleri tamamlandy. Indiki ädim maglumatlaryň üstünde işlemek bolar, deslapky netijeler bolsa 2024-nji ýylyň üçünji çärýeginde çap ediler diýlip garaşylýar.
MICS7 barlaglaryň barşynda milli maksatlara we global borçnamalara, şol sanda Durnukly ösüş maksatlaryna (DÖM) tarap ösüşi öwrenmäge mümkinçilik berýän esasy görkezijiler ölçeldi. Maglumat ýygnamagyň hilini üpjün etmek, şeýle hem MICS toparlaryna teklipler we maslahatlar bermek üçin Türkmenistanyň Statistika baradaky döwlet komitetiniň we ÝUNISEF-iň ýurt hem sebit bölümleriniň wekilleriniň gatnaşmagynda ähli sebitlere we şäherlere yzygiderli gözegçilik saparlary geçirildi.
Jogaplaryň möçberi garaşylanyndan ýokary bolup, Türkmenistanyň hojalyk agzalarynyň – hem zenanlaryň, hem erkekleriň pikir soralyşyga işjeň gatnaşmaga we gymmatly maglumatlar bermäge taýýardygyny görkezdi. ÝUNISEF we hyzmatdaşlary pikir soralyşyga işjeň gatnaşan ähli hojalyk agzalaryna hoşniýetliligi we hyzmatdaşlygy üçin hoşallyklaryny bildirýärler.
ÝUNISEF-iň Türkmenistandaky wekili Muhammet Faýaziniň sözlerine görä: «MICS7 maglumat ýygnamagyň tamamlanmagy ýurduň ösüş tagallalarynda öňe ädilen möhüm ädimdir. Türkmenistanda geçirilen barlagyň bu tapgyry mazmunynyň giňeldilendigi we öý hojalygynyň ähli agzalary barada maglumatlary öz içine alýandygy bilen tapawutlanýar. ÝUNISEF MICS7-niň bütin dünýäde çagalaryň we maşgalalaryň durmuşyny gowulandyrmaga gönükdirilen syýasaty we maksatnamalary işläp düzmekde, şeýle hem DÖM-e ýetmek ugrundaky ösüşe gözegçilik etmekde esasy edara bolup galmagy ugrunda çykyş edýär».
