Gazagystanda Hazar deňziniň kenarynda ýerleşýän Aktau şäherinde «Aktau–2025-de türki dünýäsiniň medeni paýtagty» atlandyrylan ýylyň dabaraly açylyşy boldy. Dabara TÜRKSOÝ-a agza ýurtlaryň: Gazagystanyň, Azerbaýjanyň, Gyrgyzystanyň, Türkmenistanyň, Türkiýäniň we Özbegistanyň ministrleri we medeniýet ministrlikleriniň ýokary wezipeli işgärleri, şeýle hem TDG-niň synçy ýurdy bolan Wengriýanyň wekiliýeti gatnaşdy.

Etnoşäher «Darhan Dala» türki halklaryň agzybirliginiň we birek-birege hormatynyň aýdyň nyşanyna öwrüldi. Ol gepleşikleriň we netijeli hyzmatdaşlygyň möhüm guraly hökmünde medeniýetiň kuwwatly güýjüni aç-açan görkezdi.

Ýörite dikilen öýlerde türki ýurtlardan gelen halk senetleriniň ussatlary özleriniň baý sungatyny we özboluşly däplerini görkezdiler. Dabaranyň çäginde TÜRKSOÝ-yň ähli ýurtlaryndan gelen suratkeşleriň we ökde hünärmentleriň sergisi açyldy.

Bu ajaýyp festiwal dürli medeniýetleri birleşdirýän hakyky saz köprüsi boldy. Onuň sahnasynda gyrgyz komuzynyň, azerbaýjan balabanynyň, türk baglamasynyň we türkmen dutarynyň ýakymly owazlary sazlaşykly utgaşmak bilen, tomaşaçylara türki dünýäsiniň aýdym-saz mirasynyň dürlüligini doly suratda açyp görkezdi.

Bu çärä türkmenistanly döredijilik toparlary aýratyn öwüşgin berdi, olar myhmanlara we festiwala gatnaşýanlara özboluşly milli aýdymlary, tanslary, ezber dutar çalmak sungatyny we bagşynyň ylhamlandyryjy ýerine ýetiriş ussatlygyny bagyş etdiler. Türkmen tansçylarynyň çäksiz gujur we joşgun bilen ýerine ýetiren gadymy «Küştdepdi» tansy halk köpçüliginde ýatdan çykmajak täsir galdyrdy.

Aktau şäheri «Türki dünýäsiniň medeni paýtagty» diýen bu ady 2024-nji ýylda ýokary derejeli ady abraý bilen göteren Türkmenistanyň Änew şäherinden aldy.