Aşgabadyň Bagtyýarlyk etrabynyň Täze zaman Medeniýet öýüniň zalynda 2025-nji ýylyň «Halkara parahatçylyk we ynanyşmak ýyly» şygarynyň çäginde ýurdumyzyň dürli künjeginden gelen iň ezber dessançy bagşylaryň gatnaşmagynda «Dessançylyk sungaty parahatçylygyň ylham çeşmesi» atly konsert boldy. Konsert Türkmenistanyň Medeniýet ministrliginiň Maddy däl medeni miras bölüminiň başlangyjy bilen ýola goýuldy.
Konsert maksatnamasyny dutarçy Täçmuhammet Durdymyradowyň we gyjakçy Rahman Şanazarowyň sazandalyk etmeginde ahally bagşy Ýalkap Durdymyradow açdy. Sazandalar «Alpamyş» dessanyndan bir parçany joşgun bilen ýerine ýetirip, tomaşaçylaryň şowhunly alkyşyny aldylar.
Dessanyň geçen asyryň 60-njy ýyllarynda Mary we Lebap welaýatlarynda bagşylaryň arasynda giňden ýaýrandygyny bellemelidiris.
«Alpamyş» – watançylyk we söýgi mowzugynda rowaýatlar düzülen gahrymanyň ady. Häzir bu dessany ähli welaýatyň bagşylary ýerine ýetirýärler. Özi-de, her welaýatda dessanyň ýordumynda we ýerine ýetirilişinde käbir tapawutlar bar. «Alpamyş» meşhur epik gahryman Görogludan has uly bolmagy häsiýetlidir. Onuň barasynda baryp-ha XVI asyrda agzalyp geçilýär.
Beýleki birnäçe dessanlar ýaly, «Alpamyş» Gazagystanda, Özbegistanda we Gyrgyzystanda giňden ýaýrandyr. Bu ýurtlar «Alpamyş» dessanyny ÝUNESKO-nyň Adamzadyň maddy däl medeni mirasynyň sanawyna girizmek teklibini öňe sürdüler. Bu teklibe Türkmenistan hem goşuldy.
Balkan welaýatyndan gelen bagşy Ýagmyrgeldi Hangeldiýew Akmyrat Şyhyýewiň dutarda, Öwezmyrat Begjikowyň gyjakda sazandalyk etmeginde «Saýyly we boýny ýogyn» dessanyndan bir parçany ýerine ýetirdi. Dessanyň gahrymany Saýyly ynjyk bir gyza aşyk bolýar we bagşylaryň ýaryşyna gatnaşyp, şu aýdymy söýgülisine bagyşlaýar.
Konsert maksatnamasyna «Hüyrlukga – Hemra», «Şasenem –Garyp», «Görogly», «Ýusup – Ahmet», «Nejep oglan» dessanlary girýärdi. Türkmenistanyň at gazanan bagşylary Bibinur Aşyrowa, Nowruzguly Mätnyýazow, Sabur Saburow, Kerwen Ýowbasarow, şeýle hem Kerim Annagulyýew we Akmyrat Ýakubow dagy gadymy dessançylyk sungatyny diňleýjilere ýetirmekde ussatlyklaryny görkezdiler. Zaldaky tomaşaçylar bagşylaryň her çykyşyny uly gyzyklanma bilen kabul etdiler.
Konsert Gahryman Arkadagymyzyň sözlerine düzülen «Türkmenistan – parahatçylygyň we ynanyşmagyň Watany» atly aýdym bilen tamamlandy. Bu aýdymy ýerine ýetirmäge ähli bagşy-sazandalar gatnaşdy. Tomaşaçylar 2025-nji ýylyň şygary bilen utgaşýan bu aýdymy dik durup diňlediler.
Konserte gatnaşanlaryň her birine halk sungatyny gorap saklaýandygy üçin tüýs ýürekden ykrar edilmegiň alamaty hökmünde Türkmenistanyň Medeniýet ministrliginden we Türkmenistanyň Kärdeşler arkalaşyklarynyň Milli merkezinden gymmat bahaly sowgatlar gowşuryldy.
