Aşgabat şäheriniň güni ýetip gelýär we däp bolup galan düzgüne görä, ýurdumyzyň döredijilik toparlary tomaşaçylar üçin aýratyn sowgatlar taýýarlaýarlar.

Ýakyn wagtda Daşoguz welaýatynyň Nurmuhammet Andalyp adyndaky döwlet sazly drama teatry tomaşaçylary «Galkynan göwünler» atly gülküli sazly sahna oýny bilen begendirer. Oýny teatryň baş režissýory Guwanç Baýmedow sahnalaşdyrdy.

Bu oýun Türkmenistanyň halk ýazyjysy Gylyçmyrat Kakabaýewiň eseri esasynda goýlan. Oýnuň ýordumy söýgi, Watana wepalylyk we iň esasysy, ýurtda bolup geçýän ägirt uly gurluşyk ýaly baky temalary öz içine alýar.

Baş gahryman ýaňy işe başlan binagär. Onuň pikiri-hyýaly sanlylaşdyrma ornaşýan we döwrebap binalar gurulýan şäheri hem uzakdaky obalary abadanlaşdyrmak. Bu bolsa sahna oýnuny aýratyn ähmiýete eýe edýär, çünki Türkmenistanda dowam edýän giň şäher gurluşyk taslamalaryny görkezýär.

Täze sahna oýny tomaşaçylary adaty däl usullar bilen geň galdyrar – onda artistler diňe bir ýerine ýetiriji däl-de, eýsem, hekaýatyň özboluşly awtorlary hökmünde-de çykyş edýärler. Gülküli sazly sahna oýny ak mermerli paýtagta bagyşlanan aýdymlardan doly, bu bolsa oýnuň täsirini has-da güýçlendirýär.

Oýna ykrar edilen sahna ussatlary we zehinli ýaş artistler gatnaşýarlar. Olaryň arasynda Türkmenistanyň at gazanan artistleri P.Hojanepesow we A.Toýlyýewa, şeýle hem D.Bekdurdyýew, M.Gulowa, B.Hallyýew, L.Gafurowa, N.Hydyrowa, M.Nazarowa dagy bar.

«Galkynan göwünler» sahna oýnunyň ilkinji görkezilişi Aşgabat şäheriniň gününe we okuw ýylynyň ahyryna ajaýyp sowgat bolar.