Çagalary goramagyň halkara gününiň öňüsyrasynda Türkmenistanyň Medeniýet ministrliginiň Şekillendiriş sungaty sergiler merkezinde Aşgabadyň 2-nji çagalar çeperçilik mekdebiniň okuwçylarynyň işleriniň sergisi boldy. Çagalar 200 surat we 100-e golaý keramika hem-de zergärçilik işlerini görkezdiler. Başlangyç suratkeşler üçin tanymal nakgaşlar bilen bir ýerde sergi geçirmek örän uly iş.

Biziň ünsümizi çeken ilkinji surat Altynaý Amannyýazowanyň «Bahar gülleri» suratydy. Altynaý suratyň tutuş ýerligini gülleýän ösümlikler bilen doldurypdyr. Batyrgaýlyk bilen çekilen ynamly maskalar, tebigy reňk utgaşygyny gaýtalaýan synagdan geçen reňk utgaşygy bu işi iň üstünlikli işleriň biri hökmünde saýlaýar. Bibi Sapargulyýewanyň çeken öz portreti täsin görünýär. Mekdep lybasyndaky gyzy şekillendirýän portrete ilkinji gezek duş geldik. Ýöne Bibi portretiň hötdesinden üstünlikli gelipdir, şonuň üçin-de indi mekdep okuwçylarynyň arasynda ýaşlyk suratynda özüni ebedileşdirmek isleýän köp bolsa gerek.

Gültäç Ataýewa «Geçmişden geljege» atly ajaýyp işini görkezdi. Ol Soltan Sanjar mawzoleýiniň we häzirki paýtagtymyzyň täze binalarynyň ýerliginde çapyşýan ahalteke atlaryny şekillendiripdir. Bu çylşyrymly watançylyk mowzugy, ýöne täze başlaýan suratkeş onuň hötdesinden gelmegi başarypdyr. Gültäç, esasan-da, atlaryň tebigy çapuwyny görkezmekde üstünlik gazanypdyr.

«Türkmen hazynalary» – Abat Paşşykowa natýurmortyny şeýle atlandyrypdyr. Dogrudanam, garpyz pellesi şeýle bir «janly» we işdä oýaryjy welin, suratyň ady muňa doly laýyk gelýär.

Nurana Rahymgulyýewanyň «Bagtly çagalyk ýyllary» atly işinden şatlyk bark urýar. Nurana sabyn köpürjikleri bilen oýnaýan çagalaryň şatlygyny berip bilipdir.

– 2-nji çagalar çeperçilik mekdebinde 230 çaga okaýar – diýip, surat mugallymy Muhabbat Hudaýgulyýewa gürrüň berýär. – Çagalar bu ýere surat çekmek islegi bilen gelýärler, başarnygy bolsa mekdebimizde ele alýarlar. Okuwçylaryň üstünliklerinde mugallymlar-da öz üstünliklerini görýärler. Gyrgyzystanda geçen ýaş suratkeşleriň sergisinde 3-nji ýeri eýelän we Moskwadan Hormat hatyny alyp gelen Muhammetnur Ýaranow – mekdebimiziň buýsanjy.

Muhammetnur surat çekmek bilen çynlakaý meşgullanýar, boş wagtlarynda bolsa dürli senetçilik önümlerini döretmegi halaýar. Onuň käbir işleri keramiki önümleriň sergisini bezedi. Muhammetnuryň arheologlaryň dinozawr gören işi aýratyn gyzyklanma döredýär.

Zergärlik sungaty çagalaryň arasynda uly meşhurlyga eýe. Sergide zenan şaý-sepleriniň üç görnüşi görkezilýär. Çagalaryň milli röwüşde ýasan monjuklaryndan we gulakhalkalaryndan sergä gelen ýekeje zenan hem ýüz öwürmese gerek.

Sergi çagalar çeperçilik mekdebiniň okuwçylarynyň ýokary taýýarlyk derejesini görkezdi.