Paýtagtymyzyň «Ýyldyz» myhmanhanasynda «Parahatçylyk, durnukly ösüş we migrasiýa» atly halkara maslahat geçirildi. Türkmenistanyň başlangyjy boýunça 2025-nji ýylyň BMG-niň Baş Assambleýasy tarapyndan «Halkara parahatçylyk we ynanyşmak ýyly» diýlip yglan edilmegi mynasybetli Türkmenistan tarapyndan başlanan bu çäre ählumumy we sebit syýasatyna ynanyşmagyň düýpli ähmiýetini nygtaýar.
Garyşyk görnüşde geçirilen bu maslahat Russiýadan, Azerbaýjandan, Eýrandan, Türkiýeden wekilleri bir meýdançada jemledi. Şeýle hem maslahata migrasiýa syýasaty bilen baglanyşykly döwlet edaralarynyň wekilleri gatnaşdylar. Şeýle hem Azerbaýjan, Eýran, Russiýa Federasiýasy we Türkiýe ýaly sebitde öňdebaryjy tejribesi bolan ýurtlardan halkara guramalarynyň bilermenleri we wekilleri çagyryldy.
Çäräniň açylyşynda çykyş edenler maslahatyň parahatçylyk we birek-birege hormat goýmak ýörelgelerini, aýratyn hem migrasiýa, migrantlaryň hukuklaryny goramak we daşky gurşawyň durnuklylygy, jähtinden durmuşa geçirmek üçin meýdança öwrüljekdigini bellediler. Oňa gatnaşanlar sebit ösüşi we durnuklylyk üçin möhüm ähmiýete eýe bolan ugurlary ara alyp maslahatlaşdylar.
Birinji mejlis şahsyýetleri kesgitlemek we resminamalary kadalaşdyrmak boýunça häzirki zaman çemeleşmelere bagyşlandy, onuň çäklerinde migrasiýa dolandyryşynyň howpsuzlygyny we netijeliligini ýokarlandyrmak üçin tejribe alşyldy. Ekologiýa wehimleri we olaryň migrasiýa täsiri baradaky ikinji mejlisde howanyň üýtgemeginiň we daşky gurşawyň zaýalanmagynyň migrasiýa edýän täsirine, şeýle hem howanyň üýtgemegine uýgunlaşmak boýunça halkara başlangyçlara garaldy. Onuň maksady muňa jogap gurallaryny işläp taýýarlamak we ekologiýa howplary zerarly öýüni taşlamaga mejbur bolan adamlary goramak üçin sebitleýin hyzmatdaşlygy güýçlendirmekdi. Raýatsyzlygy ýok etmek, onuň ýollary we kanuny çözgütler ýaly meseleler üçünji mejlisde ara alnyp maslahatlaşyldy.
Çykyş edenler raýatsyzlygy ýok etmekde halkara hyzmatdaşlygynyň möhümdigini bellediler. «Migrasiýanyň geljegi: innowasiýalar we sanly çözgütler» atly dördünji mejlisde elektron wizalar, sanly migrasiýa kartalary we aýanlygy hem-de howpsuzlygy üpjün etmekde emeli aňyň migrasiýa dolandyryşynda tutýan orny ara alnyp maslahatlaşyldy.
Bäşinji mejlisiň temasy «Sebitleýin hyzmatdaşlyk: parahatçylyk we ynanyşmak durnukly ösüşiň hem-de netijeli migrasiýa syýasatynyň esasy hökmünde» diýlip atlandyryldy. Söhbetdeşliklerde migrasiýa akymlaryny dolandyrmakda iň gowy tejribeleri alyşmaga, hyzmatdaşlygyň gurallary we durnukly ösüş üçin hyzmatdaşlygyň geljegi uly ugurlaryny kesgitlemäge üns berildi. Bu möhüm çäräni Aşgabatda geçirmegi Türkmenistanyň ählumumy möhüm we sebit meseleleri boýunça gepleşikleri teklip etmekde we goldamakda, parahatçylygyň pugtalandyrylmagyna, durnukly ösüşine we Merkezi Aziýada migrasiýa prosesleriniň gowulaşmagyna ýardam etmekde tutýan işjeň ornuny tassyklaýar.
