2026-njy ýylyň 6-njy aprelinde Pariž şäherindäki «Théâtre de l’Opprimé» teatrynyň konsertler zalynda 2026-njy ýylyň şygary «Garaşsyz, baky Bitarap Türkmenistan – bedew batly at-myradyň mekany» hem-de Milli bahar baýramy – Halkara Nowruz güni mynasybetli medeni-sazly çäre geçirildi.
2026-njy ýylyň 6-njy aprelinde Türkmenistanyň DIM-de Türkmenistanyň Daşary işler ministri Raşid Meredow bilen Yrak Respublikasynyň Türkmenistandaky Ilçihanasynyň işleri wagtlaýyn ynanylan wekili Jassim Mohammed Al-Attar bilen duşuşyk geçirildi.
Türkmenistanyň Döwlet energetika institutynyň we Halkara ynsanperwer ylymlary we ösüş uniwersitetiniň mugallymlary Hindistan Respublikasynyň Nýu-Deli şäherinde ýerleşýän Hindi tehniki we ykdysady hyzmatdaşlyk (ITEC) okuw maksatnamasynyň çäginde Bilim meýilleşdirilişi we dolandyrylyşy milli institutynyň (NIEPA) 30-njy martdan 10-njy aprel aralygynda geçirýän «Institusional meýilnamalaşdyryş boýunça bilim edaralarynyň ýolbaşçylary üçin halkara maslahat – II tapgyr» («International programme on institutional planning for heads of educational institutions Iteration – II») maslahatyna gatnaşýarlar.
Daşoguz welaýatynyň Boldumsaz etrabynyň gök ekerançylary düýp soganyň, käşiriň we kelemiň ýazky ekişini üstünlikli tamamladylar. Bu ekinler has köp mukdarda G.Atamedow adyndaky we Zähmetkeş daýhan birleşiklerinde ekildi. Etrap boýunça jemi 120 gektar meýdana sogan, 70 gektara käşir we 40 gektara kelem ekildi.
2026-njy ýylyň 6-njy aprelinden başlap, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň öňdebaryjy alymlary Korneli Kekelidze adyndaky Gruziýanyň Milli golýazmalar merkezinde giň gerimli ylmy-barlag işlerine başladylar.
