Koreýa Respublikasynyň opera artistleriniň konserti Aşgabatda geçen Koreýanyň Medeniýet hepdeliginiň «tamamlaýjy kakuwy» boldy.
Magtymguly adyndaky milli sazly drama teatrynyň sahnasynda tenor Kwon Hwapýoň we messo-soprano Kwon Miji dagy çykyş etdiler. Resul Gylyjowyň ýolbaşçylygyndaky Türkmen Döwlet simfoniki orkestriniň sazandalyk etmeginde çagyrylan aýdymçylar söýgini, tebigaty we durmuş gözelligini wasp edýän koreý liriki eserlerini, şeýle hem dünýä nusgawy sazynyň ajaýyp eserlerini ýerine ýetirdiler.
Agşamyň ahyrynda artistler mähirli garşylanandyklary üçin çuňňur hoşallyk bildirdiler. Tenor Kwon Hwapýoň özüniň myhmansöýer Türkmenistana üçünji gezek gelişidigini belledi.
– Ýene gözel Aşgabatda çykyş edenime diýseň begenýärin. Her gezek türkmen sahnasyna çykanymda, men aýratyn tolgunma duýýaryn. Meniň üçin Türkmenistanda çykyş etmek gymmatly medeni alyş-çalşygydyr – diýip, aýdymçy türkmen halkynyň milli däp-dessurlaryny we aýdym-saz mirasyny has çuňňur öwrenmek isleýändigini aýtdy.
Geçen ýyl Koreýanyň Medeniýet günlerine gatnaşan Kwon Miji hem özünde galan täsirler barada gürrüň berdi. Ol, dünýäniň dürli künjeklerinde çykyş edendigine garamazdan, Türkmenistanyň özi üçin özboluşly ýurt bolup galýandygyny, köňlüniň ýene-de barsam diýip telwas edýän ýeke-täk ýurdudygyny aýtdy.
Koreýa Respublikasynyň ilçihanasy we Türkmenistanyň Medeniýet ministrligi tarapyndan bilelikde guralan Koreýanyň Medeniýet hepdeligi ynsanperwer gatnaşyklaryň çalt depginde ösýändiginiň aýdyň tassyklamasy boldy. Bu çäreler dostlugy we özara düşünişmegi berkitmäge, hyzmatdaşlygyň täze gözýetimlerini açmaga ýardam etdi.
Paýtagtyň ýaşaýjylary we myhmanlary konsertden daşgary «Arkaç» söwda we dynç alyş merkezinde koreý medeniýetini has golaýdan synlamaga mümkinçilik aldylar.
Iki tarapyň-da ýurtlaryň arasyndaky gepleşikleri ösdürmäge bolan gyzyklanmasynyň artmagy diňe bir sungatda däl, eýsem, bilimde-de ýüze çykýar. Döwletmämmet Azady adyndaky Türkmen milli dünýä dilleri institutynda ýerleşýän Sejoň şa adyndaky Koreýa bilim merkezi, indi alty ýyl bäri üstünlikli iş alyp barýar. Merkez, ýaşyna ýa-da derejesine garamazdan, koreý dilini öwrenmek isleýänleriň ählisi üçin açykdyr.
