Türkmenistanyň ýokary okuw mekdepleriniň talyplardyr Durnukly ösüş maksatlarynyň (DÖM) ýaş ilçileri 2 – 3-nji dekabr aralygynda Gazagystan Respublikasynyň Astana şäherinde geçirilen «Merkezi Aziýanyň ýaşlary sanly zorluga garşy» atly Sebitleýin keýs-çempionatyna gatnaşdylar.
Sebitleýin keýs-çempionaty Gyrgyzystanyň, Özbegistanyň, Täjigistanyň, Türkmenistanyň we Gazagystanyň ýokary okuw mekdepleriniň 30 talybyny bir ýere jemledi. Çäre gender we sanly zorluk meselelerine bagyşlanan hakyky ýagdaýlary (keýsleri) çözmekde ýaşlaryň liderlik, seljeriş we aragatnaşyk ukyplaryny ösdürmäge gönükdirildi.
Türkmenistandan ýaş ilçileriň düzüminde ýurdumyzyň ýokary we orta hünär okuw mekdepleriniň talyplary bar. Olaryň hatarynda: Aýsoltan Esenowa (Oguz han adyndaky Inžener-tehnologiýalar uniwersiteti), Serwi Nuryýewa, Ýazgül Ýazmämmedowa, Akmuhammet Annaberdiýew (Halkara ynsanperwer ylymlary we ösüş uniwersiteti) hem-de Guwanç Janmämmedow (Balkanabat nebitçilik orta hünär okuw mekdebi) bar.
Gatnaşyjylar Durnukly ösüş maksatlarynyň ilçileriniň we Birleşen Milletler Guramasynyň Ösüş maksatnamasynyň bilim başlangyçlaryna gatnaşyjylaryň arasyndan olaryň okuwdaky ýokary akademiki ukyplary, jemgyýeti ösdürmäge goşan goşantlary we durnukly ösüş ýörelgelerine ygrarlylygy esasynda saýlanyp alyndy.
Iki günlük okuw maksatnamasynyň dowamynda talyplar topar we umumy sapaklara, seljeriş we tankydy pikirlenme boýunça mejlislere, howaýy kommunikasiýa boýunça ussatlyk sapaklaryna, şeýle hem kiberarassaçylyk we emeli aňy tejribede ulanmak boýunça türgenleşiklere gatnaşdylar.
Gatnaşyjylar Birleşen Milletler Guramasynyň Ösüş maksatnamasynyň (BMGÖM), Birleşen Milletler Guramasynyň Ilat gaznasynyň (ÝUNFPA), Birleşen Milletler Guramasynyň Çagalar gaznasynyň (ÝUNISEF), «BMG – Zenanlar» we Bütindünýä Saglygy Goraýyş Guramasynyň (BSGG) bilermenleriniň ýolbaşçylygynda mowzuklaýyn tanyşdyryş çykyşlaryny taýýarladylar.
Çäräniň meýdançasynda Merkezi Aziýa ýurtlaryndan düzülen garyşyk toparlar gender zorlugy bilen baglanyşykly hakyky meseleleriň üstünde işlediler. Türkmenistanyň topary sanly kemsitmelere sezewar bolanlara onlaýn goldaw berýän, taýýar görkezmeleri hödürleýän we olary psihologlar, hukukçylar hem-de hukuk goraýjy edaralar bilen baglanyşdyrýan emeli aň esasyndaky çat-boty işläp taýýarladylar. Mundan başga-da, milli toparymyz mekdepler we ýokary okuw mekdepleri üçin öňüni alyş çärelerini we sanly howpsuzlygy güýçlendirmäge gönükdirilen özüňi alyp barmagyň kadalarynyň taslamasyny taýýarlady.
Keýs-çempionaty diňe bir sebit hyzmatdaşlygy üçin giňişlik bolman, eýsem has howpsuz we öz içine alýan sanly gurşawy döretmäge gönükdirilen amaly çözgütleri işläp taýýarlamak üçin netijeli meýdança öwrüldi.
Bu çäre Ýaponiýanyň Hökümetiniň goldawy bilen BMGÖM-niň «Merkezi Aziýada zorlukly ekstremizmiň öňüni almak üçin ýerli bileleşikleriň durnuklylygyny ösdürmek» atly sebitleýin taslamasynyň çäginde geçirildi.
Keýs-çempionatyny geçirmek baradaky başlangyç «Gender zorluga garşy 16 günlük işjeň hereketler» atly ählumumy kampaniýanyň çäginde öňe sürüldi. Ol ýaşlaryň gender we sanly zorluga garşy göreşe işjeň gatnaşmagyny üpjün etmäge, ýaş liderleriň sebit agzybirligini we hyzmatdaşlygyny berkitmäge, şeýle hem bilim alyşmak üçin durnukly meýdança hökmünde DÖM boýunça Merkezi Aziýa keýs-toparyny (Central Asia Case Club) döretmäge we ýaşlaryň gatnaşmagyna gönükdirilendir.
