Türkmenistandaky Fransuz instituty fransuz dili boýunça ýöriteleşdirilen okuwlary guraýar hem-de gyzyklanýan ähli diňleýjileri okuwa gatnaşmaga çagyrýar.

Yzygiderli okuwlar institutyň tejribeli mugallymlarynyň ýolbaşçylygynda 4-nji fewraldan 8-nji mart aralygynda geçiriler. Gatnaşjaklary hasaba almak 2-nji fewrala çenli duşenbe gününden anna güni aralygynda sagat 14:00-dan 19:00-a çenli amala aşyrylar. Orunlaryň sany çäklidir.

Fransuz dili boýunça ýöriteleşdirilen okuwlar taýýarlygyň dürli derejesine we okamagyň dürli maksatlaryna laýyk gelýän maksatnamalar boýunça geçiriler. Sapaklaryň guralmagyna anyk iş usullary arkaly we maksadalaýyk çemeleşilmegi netijesinde okuwlar diňleýjilere grammatika bilimlerini çuňlaşdyrmaga, gepleşmek başarnyklaryny ösdürmäge hem-de sözleýişi kämilleşdirmäge kömek eder.

Gysga möhletli okuw taýýarlygyň üç ugruny – çuňlaşdyrylan grammatikany (B1-B2 dereje), kommunikatiw okuwy (A2-B1 dereje), fonetik okuwy (A1-B1 dereje) teklip edýär.

Her ugur 20 sagat okuwy özünde jemleýär, bu bolsa sapaklaryň çuňňur we tapgyrlaýyn özleşdirilmegini üpjün edýär.

Okuwlar dil başarnyklaryny iş ýüzünde ösdürmäge gönükdirilendir hem-de fransuz dilini öwrenmäge gyzyklanýan giň köpçülige peýdaly bolar.

36-83-70, 36-83-71, 36-83-72 telefon belgilere jaň edip hem-de ift.secretaire@gmail.com elektron salgysy boýunça okuwlara ýazylyp bolar, şeýle hem goşmaça maglumatlary alyp bolar. Türkmenistandaky Fransuz institutynyň salgysy: Aşgabat şäher, Aga Garryýew köçesiniň 69-njy jaýy.