Türkmenistanda ylym we bilim ulgamy sanly giňişlikdäki ornuny has-da pugtalandyrýar. Ministrler Kabinetiniň mejlisinde hormatly Prezidentimiz Serdar Berdimuhamedow «Ylmy barlaglar we innowasiýalar» atly ylmy-köpçülikleýin elektron žurnalyny döretmek baradaky başlangyjy makullady.

Täze neşir ýurduň öňdebaryjy ýokary okuw mekdebinde – Magtymguly adyndaky Türkmen döwlet uniwersitetiniň esasynda dörediler.

Žurnal tejribe alyşmak we türkmen ylmynyň gazananlaryny wagyz etmek üçin döwrebap meýdança hökmünde göz öňünde tutulýar. Makalalar türkmen, iňlis we rus dillerinde çap ediler, bu bolsa neşiriň halkara okyjylar köpçüligine elýeterli bolmagyny üpjün eder.

Elektron neşir tejribeli professor-mugallymlar bilen bir hatarda, ylma ilkinji ädimlerini ädýän talyplar üçin hem açyk bolar. Neşir filologiýa, psihologiýa, hukuk ylymlary ýaly ugurlardan başlap, milli mirasy öwrenmek we beýik şahsyýetleriň dünýä medeniýetine goşan goşandyna çenli giň gerimli mowzuklary öz içine alar.

Žurnalyň esasy maksatlarynyň biri bilim bilen hakyky ykdysadyýetiň arasyndaky özara gatnaşyklaryň amaly netijelerini görkezmek bolar. Neşirde innowasion işläp taýýarlamalaryň ornaşdyrylmagyna we döwrebap okuw usullaryna bagyşlanan makalalar ýerleşdiriler.

Hasabatynyň dowamynda Ministrler Kabinetiniň Başlygynyň orunbasary B.Orazdurdyýewa bu žurnalyň döredilmeginiň ýaşlary täze ylmy açyşlara we işläp taýýarlamalara höweslendirmäge gönükdirilendigini belledi.

Döwlet Baştutanymyz teklibi makullap, neşiri taýýarlamak boýunça degişli işlere girişmegi tabşyrdy.