Magtymguly adyndaky Türkmen döwlet uniwersitetiniň rus dili we edebiýaty hünäriniň 4-nji ýyl talyby Läle Rzagulyýewa Russiýa Federasiýasynyň Sibir federal uniwersiteti tarapyndan talyplaryň arasynda guralan rus dili boýunça «ÝaRus» XVII halkara olimpiadasynda I orny eýeledi.
Uzak aralykdan gatnaşmak boýunça geçirilen olimpiadanyň çäklerinde oňa gatnaşyjylar üç ugur ̶ ynsanperwer ugurly hem-de ynsanperwer ugurly däl hünärler boýunça russiýaly hem-de daşary ýurtly talyplar bäsleşdiler. Gatnaşyjylaryň her topary üçin ýumuşlar aýry-aýry taýýarlanyldy.
Läle Rzagulyýewanyň üstünlikli çykyş eden daşary ýurtly gatnaşyjylar üçin taýýarlanan ýumuşlar birnäçe tapgyry özünde jemläp, onuň rus diline erk edip bilişine toplumlaýyn baha bermäge mümkinçilik berdi. Daşary ýurtly talyplar leksika, grammatika hem-de fonetika boýunça ýumuşlary ýerine ýetirip, rus dilinde sözleriň düzülşine we aýdylşyna çuňňur düşünýändiklerini görkezdiler.
Olimpiadanyň ýumuşlary özboluşly häsiýete eýe boldy hem-de oňa gatnaşyjylardan diňe bir rus dilini bilmegi däl, eýsem, ukyp-başarnygy, döredijilikli çemeleşmäni, dürli çeşmeler bilen işlemek başarnygyny, neýroulgamlary hem-de emeli aňyň beýleki gurallaryny ulanmaklaryny talap etdi.
Olimpiadanyň netijeleri boýunça eminler türkmen talyp gyzynyň rus dili boýunça bilim we taýýarlyk derejesiniň ýokarydygyny bellediler. Läle bäsleşigiň ýeňijileriniň hataryna ynamly girdi hem-de I derejeli diplom bilen sylaglandy. Üç ugur boýunça gatnaşyjylaryň arasynda I orna mynasyp bolanlaryň jemi bary-ýogy 7 sanydygyny bellemek gerek. Şolaryň birini ýurdumyzyň talybyna almak başartdy.
Türkmenistanyň ýene-de bir wekili olimpiadanyň baýrak eýeleriniň hataryna girdi. Ol häzirki wagt Russiýa Federasiýasynyň Günorta – Ural döwlet uniwersitetinde okaýan Dildora Bahtiýorowadyr. Biziň bu ildeşimiz hem «Daşary ýurtly talyplar» ugry boýunça üstünlikli çykyş etdi hem-de abraýly bäsleşikde II orny mynasyp eýeledi.
«ÝaRus» intellektual bäsleşigi Russiýanyň ýokary we orta hünär okuw mekdepleriniň 40-syndan ynsanperwer ugurly we ynsanperwer däl ugurly hünärleriň talyplarynyň 320-sini, şeýle hem ýakyn we uzak daşary ýurtlaryň 31 ýurdundan uniwersitetleriň 53-sinden 159 talyby bir ýere jemledi.
Guramaçylaryň belleýişleri ýaly, şu ýyl daşary ýurtly gatnaşyjylaryň has köp sanlysyna Gazagystan, Türkmenistan, Özbegistan, Ekwador we Hytaý wekilçilik etdiler.
