Hytaý Halk Respublikasynyň Türkmenistandaky Adatdan daşary we Doly ygtyýarly ilçisi Szi Şumin 27-nji martda Aşgabatda gysga metbugat mejlisini geçirdi. Diplomatyň we köpçülikleýin habar beriş serişdeleriniň wekilleriniň esasy ünsi bilim hem-de ynsanperwerlik ulgamlarynda strategik hyzmatdaşlyklara gönükdirildi.

«Altyn asyr» elektron gazetiniň habarçysynyň sowallaryna jogap berip, Szi Şumin Türkmenistanda hytaý dilini, Hytaýda bolsa türkmen dilini öwrenmäge bolan gyzyklanmanyň öň görlüp-eşidilmedik derejede artandygyny nygtady.

Häzirki wagtda ýurtlaryň bilim infrastrukturasy jemgyýetiň talaplaryna işjeň uýgunlaşýar. Ilçiniň sözlerine görä, Türkmenistanyň dokuz sany ýokary okuw mekdebi öz meýilnamalaryna hytaý dilini girizipdir, 10 sany orta mekdep bolsa hytaý dilini öwredýän gysga möhletli okuwlary hödürleýär we häzirki wagtda takmynan 6500 türkmen talyby Hytaýyň özünde ýokary bilim alýar.

Ilçi sözüni dowam etmek bilen, bu işiň ikitaraplaýyn häsiýetlidigini, ýagny Hytaýda hem Türkmenistanyň medeniýetine we döwlet diline gyzyklanmanyň artýandygyny belläp geçdi. Bu ýagdaý iki dili-de bilýän hünärmenlere iki ýurduň zähmet bazarynda barha köp isleg bildirilýändigi bilen şertlendirilendir.

Hytaý tarapy talyplara we hünärmenlere mundan beýläk-de goldaw bermek üçin, hytaý dil biliminiň ýöriteleşdirilen barlag merkezini döretmegiň başlangyjyny goýýar. Bu taslamany Döwletmämmet Azady adyndaky Türkmen milli dünýä dilleri institutynda amala aşyrmak meýilleşdirilýär.

«Bu ädim hytaý dilini öwrenýän türkmen raýatlary üçin has amatly şertleri döreder we bilim ulgamyndaky hyzmatdaşlygymyza täze itergi berer» diýip, diplomat nygtady.

Ikitaraplaýyn gatnaşyklarda işgärleriň amaly taýýarlygyna aýratyn üns berilýär. Häzirki wagtda taraplar hünär taýýarlygy üçin täze ýerlikleri döretmek boýunça iş alyp barýarlar.

«Bu ugurda esasy taslamalaryň biri-de Türkmenistanda ilkinji «Lu Banyň ussahanasynyň», ýagny halkara derejeli tehniki hünärmenleri taýýarlamaga gönükdirilen täzeçil bilim ýerligi bolan bilim merkeziniň gurluşygyny çaltlandyrmakdyr» diýip, Szi Şumin aýtdy.

Bilime degişli gün tertibiniň mowzugyny jemlemek bilen, ilçi Hytaýyň medeni alyş-çalşy has-da giňeltmäge taýýardygyny tassyklady. Iki ýurduň ýaşlarynyň arasyndaky gatnaşyklary berkitmek ileri tutulýan ugur bolmagynda galýar, bu bolsa Hytaý – Türkmenistan gatnaşyklarynyň uzak möhletli gülläp ösüşi üçin berk esas döreder.