Aşgabatda Daşary ýurtlardaky rus teatrlaryny goldamak maksatnamasynyň çäklerinde guralan Russiýa Federasiýasynyň Teatr işgärleriniň birleşiginiň (RF TIB) wekilleriniň döredijilik sapary geçýär. A.S.Puşkin adyndaky döwlet rus drama teatrynyň sahnasynda rus nusgawy ýazyjynyň mirasyna bagyşlanan döredijilik barlaghanasy ýaýbaňlandyryldy. Russiýaly we türkmen sungat işgärleriniň üns merkezinde «Daş myhman», «Husyt rysar» we «Mosart we Salýeri» pýesalaryny öz içine alýan «Kiçi tragediýalar» meşhur ýygyndysynyň esasynda sahnalaşdyrylýan eskiz eserleri durýar.
«Mosart we Salýeri» pýesasyna eskiz üstündäki işe moskwaly režissýor Grigoriý Artamonow ýolbaşçylyk edýär. Onuň sözlerine görä, barlaghana formaty tutuş topardan iň ýokary derejede üns bermegi we çalt çözgütleri kabul etmegi talap etdi. Tutuş türgenleşik tapgyryna bary-ýogy bäş gün bölündi, olaryň ilkinjisi materiallar bilen tanyşmaga we taýýarlamaga sarp edildi.
«A.S.Puşkin adyndaky döwlet rus drama teatrynyň aktýorlarynyň haýran gаlarlyk derejedäki işjeňligini belläp geçesim gelýär. Eýýäm ikinji günüň agşamynda biz konsepsiýany doly emele getirdik. Artistler giç agşama çenli işlemäge taýýardy, yzygiderli gyzykly çözgütleri hödürlediler we täze çemeleşmeleri oýlap tapdylar. Bize materialy hakykatdan-da bary-ýogy üç günüň içinde jemlemek başartdy» diýip, režissýor öz täsirleri bilen paýlaşdy.
G.Artamonow, şeýle hem Aşgabat teatrynyň döredijilik toparynyň ýokary hünär derejesini we ähli taraplaýyn taýýarlygyny nygtady. Aktýorlyk zehininden başga-da, türgenleşikler olaryň wokal ukyplaryny we ajaýyp zähmetsöýerligini ýüze çykardy. Sazly nomerler we ýekelikde ýerine ýetirilýän kompozisiýalar diňe bir täze eskiziň däl, eýsem, barlaghananyň çäklerinde döredilýän beýleki işleriň hem möhüm bölegi bolar.
Sahnadaky netijeli iş bilen birlikde, Russiýadan gelen myhmanlar adaty türkmen myhmansöýerligine hem ýokary baha berdiler. Türgenleşikleriň doly tertibine garamazdan, russiýaly işgärler medeni maksatnamadan iň aýdyň täsirleri aldylar. Režissýor ýerli ýaşaýjylaryň mähirliligini, Aşgabadyň binagärligini, baý türkmen medeniýetini we aşhanasyny belläp geçip, Türkmenistanyň gözel ýerleri we tebigy gözellikleri bilen tanyşmaga köpräk wagt bölmek üçin ýene-de dolanyp gelmäge umyt bildirdi.
