1-nji sentýabrda Mary welaýatynyň ähli ýerlerinde täze okuw ýylynyň başlanmagy mynasybetli ilkinji jaň sesleri ýaňlandy. Bagtyýar nesiller ak mekdebiň gujagyna doldular. Hemme mekdeplerde guralan dabaralar ýokary ruhubelentlige beslendi.
Bu gün ähli mekdeplerde ilkinji sapaklar «Garaşsyz, baky Bitarap Türkmenistan – bedew batly at-myradyň mekany» diýen şygar astynda geçirildi. Birinji synp okuwçylarynyň ählisine hormatly Prezidentimiziň we Gahryman Arkadagymyzyň sowgady bolan öz ýurdumyzda öndürilen «Bilimli» noutbuk kompýuterleriň gowşurylmagy Watanymyzyň geljegi bolan çagalar hakyndaky aladalaryň çäksizliginiň aýdyň beýanyna öwrüldi.
Bilimler we talyp ýaşlar güni mynasybetli Mary şäherindäki 24-nji zehinli ýaşlar mekdebinde welaýat derejesinde dabara geçirildi. Ir säherden çagalaryň şatlyklary bilen gurşalan, toý lybasyna beslenen meýdançada aýdym-sazyň şowhuny belende göterildi. Bu dabara ýerli edara-kärhanalaryň, ýaşuly nesliň, jemgyýetçilik guramalarynyň wekilleri, bilim ulgamynyň işgärleri, mekdep okuwçylary gatnaşdylar. Medeniýet-sungat işgärleriniň, çagalar we ýetginjekler döredijilik öýleriniň çagalar toparlarynyň ýerine ýetirmeginde hormatly Prezidentimiziň we Gahryman Arkadagymyzyň tutumly işlerini, Garaşsyzlygymyzyň 35 ýyllygyny, bagtyýar döwrümizi wasp edýän aýdym-sazly çykyşlary uzaklara ýaň saldy.
Türkmenistanyň Döwlet energetika institutynda hem, Bilimler we talyp ýaşlar güni hem-de 2026 – 2027-nji okuw ýylynyň başlanmagy mynasybetli dabara geçirildi. Bu dabarada ýokary okuw mekdebiniň «Kuwwat» aýdym-saz we tans toparynyň ýerine ýetirmeginde eziz Watanymyzy, mukaddes Garaşsyzlygymyzy wasp edýän aýdymlar baýramçylyk dabarasynyň şowhunyny artdyrdy. Talyplaryň döredijilik toparynyň, medeniýet-sungat ussatlarynyň çykyşlary giň gerime eýe boldy. Bu ýerde ýurdumyzyň bilim ulgamyny ösdürmekde geçirilýän giň gerimli özgertmeler dogrusynda buýsançly çykyşlar edildi. Birinji ýyl talyplaryna talyp şahadatnamasynyň gowşurylmagy bu dabaranyň iň tolgundyryjy pursatlarynyň biri boldy. Soňra talyplar «Garaşsyz, baky Bitarap Türkmenistan – bedew batly at-myradyň mekany ýyly» atly ilkinji okuw sapagyna gatnaşdylar.
Welaýatyň çägindäki ýörite orta we başlangyç okuw mekdeplerinde-de täze okuw ýylynyň başlanmagy mynasybetli guralan dabaralar talyp ýaşlary täze üstünliklere ruhlandyrdy.
