Maryda Ýokary liganyň toparlarynyň arasynda futbol boýunça Türkmenistanyň çempionatynyň 22-nji tapgyrynyň yza süýşürilen duşuşygy geçirildi, onda ýerli «Merw» topary öz meýdançasynda «Arkadag» toparyny kabul etdi.

Başda bu duşuşygy 7-nji oktýabrda geçirmek meýilleşdirilipdi, emma ýurduň häzirki çempionynyň halkara oýunlarynyň tertibi sebäpli has irki möhlete geçirildi. «Arkadag» topary AFK 2 Çempionlar ligasynyň çäklerinde 14-nji oktýabrda geçirilmegi meýilleşdirilýän BAE-niň «Al-Jazira» toparyna garşy oýnuna taýýarlyk görmeli bolar.

«Merw» stadionynda geçirilen duşuşyk myhmanlaryň artykmaçlygy bilen we 5:0 hasabyndaky uly ýeňşi bilen tamamlandy. Oýnuň ykbaly eýýäm birinji ýarymda kesgitlenip başlady, ýagny 18-nji minutda Altymyrat Annadurdyýew hasaby açdy. Meýdançanyň eýeleriniň esasy utulyşy duşuşygyň ikinji ýarymynda bolup geçdi: 50-nji minutda Şanazar Tirkişow öz toparynyň artykmaçlygyny iki essä ýetirdi, 62-nji minutda bolsa Ahmet Ataýew hasaby has hem ulaltdy. Bary-ýogy bir minutdan soň Annadurdyýew dubl ýerine ýetirdi, oýundaky iň soňky nokady bolsa 73-nji minutda Abdy Bäşimow goýdy.

Nobatdaky üstünligiň netijesinde «Arkadag» topary bäsleşigiň tertibinde birinjiligini has hem berkitdi we 100 göterimli netije görkezdi: geçirilen 22 duşuşykda 66 utuk gazandy. Ikinji orunda 20 oýundan soň 42 utugy bolan «Ahal» topary ýerleşýär. Ilkinji üçlügi bolsa 19 oýunda 41 utuk gazanan «Altyn asyr» topary jemleýär.

Çempionatyň iň gowy mergenleriniň sanawynda hem «Arkadag» toparynyň hüjümçisi Didar Durdyýewiň birkemsiz öňdeligi saklanýar. Soňky dört möwsümiň iň gowy oýunçysy öz hasabyna eýýäm 22 gol ýazdyrmagy başardy, olaryň dördüsi jerime urgudan geçirildi. Onuň iň ýakyn bäsdeşi «Ahal» toparynyň hüjümçisi Süleýman Mirzoýew bolup, onuň hasabynda 10 gol bar (2-si jerime urgudan).