Ï Türkmenistanyň gandbolçy gyzlary Daşkentde geçirilen «IHF Nations Trophy 2026» ýaryşynda kümüş medala mynasyp boldular
mail-icon
altynasyr.newspaper@sanly.tm
EN RU TK

Türkmenistanyň gandbolçy gyzlary Daşkentde geçirilen «IHF Nations Trophy 2026» ýaryşynda kümüş medala mynasyp boldular

view-icon 274
Türkmenistanyň gandbolçy gyzlary Daşkentde geçirilen «IHF Nations Trophy 2026» ýaryşynda kümüş medala mynasyp boldular

Türkmenistanyň gandbol boýunça zenanlar ýygyndy topary Daşkent şäherinde geçirilen taryhda ilkinji gezek guralan «IHF Nations Trophy 2026» atly halkara ýaryşynda kümüş medala mynasyp boldy. Baş tälimçi Gülendam Narbaýewanyň tälim berýän topary Özbegistanyň paýtagtynda dört duşuşyk geçirip, olaryň üçüsinde ýeňiş gazandy, diňe birinji orun ugrunda geçirilen jemleýji duşuşykda ýeňlişe sezewar boldy.

Ýaryşyň dowamynda Türkmenistanyň ýygyndysy hüjümde ýokary netijeliligi görkezip, Pakistanyň milli ýygyndysyny 38:19, Gyrgyzystanyň ýygyndysyny 47:18 we Täjigistanyň ýygyndysyny 40:14 hasaplar bilen ýeňdi. Üç ýeňişli duşuşykda türkmen gandbolçy gyzlary garşydaşlarynyň derwezesine jemi 125 pökgi geçirdiler. Hüjümdäki işjeň oýun bilen bir hatarda, toparyň umumy netijesine goragda görkezilen ygtybarly oýun hem uly goşant goşdy. Goragda Wladlena Şarafutdinowanyň tapawutlanandygyny, derwezäni goramakda bolsa derwezeban Mariýa Zaplatnaýanyň ynamly hereket edendigini bellemek gerek.

Altyn medallar ugrunda geçirilen aýgytly duşuşykda Türkmenistanyň ýygyndysy Özbegistanyň topary bilen duşuşdy. Dartgynly geçen oýunda türkmen türgenleri garşydaşlaryndan 16:21 hasabynda asgyn gelip, ýaryşyň netijeleri boýunça hormat münberiniň ikinji basgançagyna çykdylar.

Daşkentde geçirilen ýaryş Türkmenistanyň gandbol boýunça zenanlar ýygyndysynyň halkara meýdançasynda bäsdeşlige ukyplydygyny ýene bir gezek tassyklady. Şeýle hem ol toparyň indiki ýaryşlara taýýarlyk görmeginde taktiki taýýarlygy kämilleşdirmegiň zerurdygyny görkezdi. «IHF Nations Trophy 2026» ýaryşynyň ilkinji gezek geçirilmegi halkara ýaryşlarynyň täze görnüşine badalga berdi. Halkara gandbol federasiýasy bu ýaryşy geljekde her iki ýyldan bir gezek yzygiderli geçirmegi meýilleşdirýär.