Ï Ýurdumyzda talyplaryň arasynda ykdysadyýet we filosofiýa ugurlary boýunça halkara olimpiadalar geçiriler
mail-icon
altynasyr.newspaper@sanly.tm
EN RU TK

Ýurdumyzda talyplaryň arasynda ykdysadyýet we filosofiýa ugurlary boýunça halkara olimpiadalar geçiriler

view-icon 3
Ýurdumyzda talyplaryň arasynda ykdysadyýet we filosofiýa ugurlary boýunça halkara olimpiadalar geçiriler

Halkara ynsanperwer ylymlary we ösüş uniwersiteti Türkmenistanyň we daşary ýurtlaryň ýokary okuw mekdepleriniň talyplarynyň arasynda filosofiýa boýunça III halkara olimpiadanyň hem-de ykdysadyýet boýunça III halkara olimpiadanyň geçirilýändigini yglan etdi.

Olimpiadalar 7 – 11-nji dekabr aralygynda bir tapgyrda şahsy bäsleşikler görnüşinde sanly ulgam arkaly geçiriler. Bäsleşikler türkmen, rus we iňlis dillerinde alnyp barlar.

Olimpiadalara gatnaşmaga isleg bildirýän ähli talyplar çagyrylýar, ýokary okuw mekdeplerinden gatnaşyjylaryň möçberi çäklendirilmedikdir.

Filosofiýa boýunça olimpiada gatnaşyjylar iki topara bölünýär: A topary (islendik hünär boýunça bilim alýan talyplar) we B topary (filosofiýany, taryhy we beýleki jemgyýetçilik ylymlaryny öwrenmeýän talyplar).

Ykdysadyýet boýunça olimpiada gatnaşyjylar hem şonuň ýaly iki toparda çykyş ederler. Dürli taýýarlyk ugurlarynyň talyplary A topara girerler. Ykdysadyýet, dolandyryş we statistika ugurlaryndan bilim almaýan talyplar bolsa B topara degişli bolarlar.

Gatnaşyjy ýokary okuw mekdepleri olimpiada ýumuşlary hökmünde her ders boýunça 20 sany test sowallaryny we 5 sany nazary sowallary teklip edip bilerler. Takyk çözgütleri beýan edilen ýumuşlar olimpiadanyň geçirilýän senesine çenli 20 gün öňünden guramaçylyk toparyna iberilmelidir. Goşmaça maglumatlar iuhdolympiads@gmail.com elektron salgy boýunça elýeterlidir.

Olimpiada gatnaşmak üçin bellige almak Halkara ynsanperwer ylymlary we ösüş uniwersitetiniň saýtynda 4-nji dekabra çenli açykdyr.

Halkara olimpiadalar ýaş zehinleri ýüze çykarmak, ösdürmek we goldamak, giň gözýetimli ýaşlary terbiýelemek, olary ylym we döredijilik işleri bilen işjeň meşgullanmaga höweslendirmek, talyplary hünäre ugrukdyrmak hem-de olaryň intellektual taýdan ösmegi üçin oňyn şertleri döretmek maksady bilen geçirilýär.

Guramaçylar Türkmenistanyň we daşary ýurtlaryň ýokary okuw mekdepleriniň ähli gyzyklanma bildirýän talyplaryny ders bäsleşigine gatnaşmaga çagyrýarlar hem-de geçiriljek bäsleşikleriň ýokary okuw mekdepleriň talyplarynyň we mugallymlarynyň arasynda dostlukly gatnaşyklaryň pugtalandyrylmagyna ýardam etjekdigine, şeýle hem ylmy bilimler we iş tejribeler bilen özara bähbitli alyşmalar üçin mümkinçilik döretjekdigine ynam bildirýärler.