Şu gün Türkmenistanda Saýlawlary we sala salşyklary geçirmek baradaky Merkezi toparyň mejlisi geçirildi. Onda saýlaw okruglarynyň ikisi boýunça Mejlisiň deputatlarynyň we käbir okruglar boýunça çykyp gidenleriň ýerine Geňeşleriň agzalarynyň saýlawlarynyň gutarnykly netijeleri jemlendi. Mejlise Merkezi sawlaw toparynyň agzalary, Merkezi saýlaw toparynyň ýanynda döredilen işçi toparlaryň wekilleri, milli synçylar, habar beriş serişdeleriniň wekilleri gatnaşdylar.

Mejlisde geçirilen saýlawlaryň Türkmenistanyň ösüşiň demokratik ýoluna hem-de hormatly Prezidentimiz Gurbanguly Berdimuhamedow tarapyndan döwletiň we jemgyýetiň durmuşynyň ähli ulgamlarynda başy başlanan ösüşlere beslenen özgertmeler ugruna ygrarlydygynyň tassyknamasyna öwrülip, bäsleşik, aýanlyk we açyklyk ýörelgelerinde geçirilendigi nygtaldy.

Saýlawçylaryň ýokary işjeňligi bellenip geçildi. Mejlisiň deputatlygyna saýlaw okruglarynyň ikisi boýunça geçirilen saýlawlara görkezilen okruglaryň çäklerinde ýaşaýan 43 müň 624 adam gatnaşdy. Bu bolsa saýlawçylaryň sanawyna girizilen umumy möçberiniň 88,68 göterimine deňdir. Dalaşgäriň bir ornuna birnäçe adamlaryň hasaba alnandygyna bellemek gerek.

Merkezi saýlaw topary çykyp gidenleriň ýerine şu aşakdakylary deputatlyga hasaba aldy: Mary welaýatyndaky 99-njy “Kemine” saýlaw okrugy boýunça—Ş. Amangeldiýewa; Mary welaýatynyň 103-nji “Zarpçy” saýlaw okrugy boýunça—R.Bazarowa. Milli parlamentiň täze saýlanan deputatlaryna şahadatnamalar gowşuryldy. Şu pusratdan başlap olar ýurduň ýokary kanunçykaryjylyk edalasynda halkyň doly hukukly wekilleri bolup durýarlar.

Käbir okruglar boýunça Geňeşleriň agzalygyna saýlawlara 42 müň 707 adam gatnaşdy. Munuň özi saýlawçylaryň umumy sanynyň 87,38 göterimine barabardyr. 298 dalaşgärden ýerlerdäki halk häkimiýetiniň edaralaryna 149 wekil saýlandy. Şol sanda Ahal welaýatynda-20, Balkan welaýatynda-6, Daşoguz welaýatynda-24, Lebap welaýatynda-35, Mary welaýatynda-64.

Türkmenistanda Saýlawlary we sala salşyklary geçirmek baradaky Merkezi toparyň mejlisiniň barşynda saýlaw okruglarynyň ählisi boýunça saýlawlaryň geçişine gözegçiligi amala aşyran milli synçylaryň işlerini işjeň alyp barandygy bellendi.

Halkyň saýlanlarynyň köpüsi döwlet häkimiýet we dolandyryş edaralarynyň, bilim, saglygy goraýyş ulgamlarynyň işgärleri, oba zähmetkeşleri, halk hojalygynyň dürli pudaklarynyň tejribeli hünärmenleri, şeýle hem syýasy partiýalaryň agzalary, jemgyýetçilik guramalarynyň we birleşmeleriniň işjeňleridir.

Hemme saýlaw uçastoklarynyň döwrebap aragatnaşyk serişdeleri bilen enjamlaşdyrylmagynyň netijesinde maglumatlaryň işlenilip taýýarlanylmagy we Türkmenistanyň Saýlawlary we sala salşyklary geçirmek baradaky Merkezi toparyna hiç hili saklanmazdan iberilmegi amala aşyryldy.

Merkezi saýlaw toparynyň mejlisinde Geňeşleriň agzalygyna saýlananlaryň sanawlaryna garaldy we tassyklanyldy. Olar hereket edýän milli kanunçylygyň düzgünlerine laýyklykda eýýäm ýakyn wagtda köpçülikleýin habar beriş serişdelerinde çap ediler.

Mejlisiň ahyrynda oňa gatnaşyjylar saýlawlaryň ýurdumyzda hereket edýän kanunçylyga hem-de halkara hukugynyň umumy kabul edilen kadalaryna laýyklykda ýokary guramaçylyk derejesinde geçirilendigini nygtadylar.

Şeýlelikde, milli parlamentiň täze saýlanan deputatlarynyň we Geňeşleriň täze agzalarynyň öňünde möhüm wezipe durýar. Ol wezipe ýurdumyzda amala aşyrylýan ösüşlere beslenen özgertmelere hem-de ösüşiň toplumlaýyn maksatnamalaryna işjeň gatnaşyjylara öwrülmekden ybaratdyr. Diýmek, Watandaşlaryň bildiren ynamyna bolan jogapkärçilik ýokarydyr. Halkyň saýlanlaryna bolsa şol ynamy anyk işler bilen ödemek wezipesi garaşýar.

Merkezi saýlaw toparynyň mejlisinde guramaçylyk meseleleriniň başga-da birnäçesine garaldy we olar boýunça degişli çözgütler kabul edildi.