Aşgabadyň demirgazyk böleginde ýerleşýän Içeri işler ministrliginiň Sport-ulag merkezinde “Ýol hereketiniň howpsuzlygy — ömrümiziň rahatlygy” atly ýol hereketiniň howpsuzlygynyň biraýlygynyň çäreleriniň jemlenmegine bagyşlanan dabara boldy.

Milli Liderimiz Gurbanguly Berdimuhamedowyň tabşyrygyna laýyklykda, güýzüň ilkinji aýy tutuş ýurdumyz boýunça ýaýbaňlandyrylan ýol hereketiniň howpsuzlygyny üpjün etmek boýunça giň gerimli çärelere beslendi. Biraýlygyň çäklerinde ýurdumyzyň ähli künjeklerinde polisiýanyň ýol gözegçilik gullugynyň işgärleri köp gatnawly köçelerde we şaýollarda ýol hereketiniň düzgünleriniň berjaý edilmegine gözegçilik etdiler, ähli okuw-bilim edaralarynda, kärhanalarda we guramalarda polisiýanyň ýol gözegçilik gullugynyň wekilleriniň gatnaşmagynda söhbetdeşlikler we maslahatlar, duşuşyklar we beýleki çäreler geçirildi.


Umumybilim berýän mekdeplerde we mekdebe çenli çagalar edaralarynda ýeňijilere höweslendiriji baýraklary gowşurmak bilen köp sanly bäsleşikler, şol sanda Aşgabatda çagalar awtodromynyň binýadynda oýun görnüşli okuwlar geçirildi. Bulardan başga-da, ýol hereketiniň howpsuzlygyna bagyşlanan mekdep burçlaryny, tälim berýän diwarlyklary guramak hem-de orta mekdepleriň we mekdebe çenli çagalar edaralarynyň binýadynda okuw-tälim beriş meýdançalaryny guramak boýunça uly işler geçirildi. Şeýle hem tutuş ýurdumyz boýunça jemgyýetimizde ýolda özüňi alyp barmagyň ýokary medeniýetini wagyz etmäge, ýol hereketine gatnaşyjylaryň her biriniň umumy howpsuzlukda şahsy jogapkärçiligine düşünmegine gönükdirilen beýleki maksatnamalaýyn çäreler giňden ýaýbaňlandyryldy.


Şu gün Sport-ulag merkeziniň çäginde ýörite enjamlaşdyrylan konsert meýdançasynda ýaş estrada aýdymçylarynyň, tans we döredijilik toparlarynyň çykyşlary boldy. Bu ýere okuwçylar we işçi ýaşlar, jemgyýetçilik guramalarynyň, Türkmenistanyň IIM-niň ýol gözegçiligi gullugynyň wekilleri we köp sanly myhmanlar ýygnandylar.

Monitorlarda ýurdumyzyň sport ulgamynda we sagaldyş hereketini ösdürmekde gazanan üstünliklerini beýan edýän şekiller görkezildi. Hormatly Prezidentimiz Gurbanguly Berdimuhamedowyň sportuň dürli görnüşleri bilen meşgullanýan, şol sanda ýaryş ulaglaryny dolandyrýan pursatlary ýygnananlarda guwançly täsirleri döretdi.

Häzir türkmen awtomobil sportunyň öňünde täze mümkinçilikler açylýar, şunda bolsa döwlet Baştutanymyz Gurbanguly Berdimuhamedowyň ägirt uly tagallalary bar. Soňky ýyllarda ýokary tizlikli ulaglaryň üstüniň olaryň döwrebap görnüşleri bilen ýetirilmegi sportuň çylşyrymly, emma özüne çekýän görnüşi bilen meşgullanmak isleýänleriň sanynyň artmagyna, sürüji türgenleriň we olaryň tälimçileriniň ussatlygyny ýokarlandyrmaga ýardam etdi.


Çykyşlaryň biri tomaşaçylarda aýratyn täsir galdyrdy. Ýaş aýdymçy aýdym aýdyp duran pursady ýaryş awtoulagy çalasyn hereketleri bilen onuň daşyndan aýlandy.

Ýaş türgenleriň, şeýle hem welosipedçileriň görkezme çykyşlary hem-de sport awtoulaglarynyň özboluşly sergisi şu günki dabaranyň bezegine öwrüldi. Olary — “Alfa Romeo Guilietta”, “Volkicar”, “Renault”, “Mitsubishi Lancer” ýaly ýaryş awtoulaglary, karting üçin kiçi bolidler we beýlekiler Sport-ulag merkeziniň açylan güni hormatly Prezidentimiz Gurbanguly Berdimuhamedowyň adyndan merkeze sowgat berildi.

Bularyň hemmesi bilelikde baýramçylygyň joşgunly görnüşini emele getirdi, onda ajaýyp aýdym-sazlar ýaňlandy.