Lebap welaýatynyň merkezinde maýyplara we durmuş goraglylygyna aýratyn mätäçlik çekýän beýleki raýatlara niýetlenen ýaşaýyş jaýlarynyň düýbüni tutmak dabarasy boldy. Gurluşyk meýdançasynyň çäkleri baýramçylyk görnüşinde beslenipdir. Bu ýere Mejlisiň Başlygy hem-de deputatlary, ýerli häkimiýet edaralarynyň, kärhanalaryň we guramalaryň ýolbaşçylary, hormatly ýaşulular, ýaşlar hem-de bu desgany bina etmek tabşyrylan Zerger demir-beton gurnama zawodynyň gurluşykçylary ýygnandylar.

Ak öýleriň bezemen hatarlary, türgenleriň, estrada aýdymçylarynyň, bagşylaryň çykyşlary, joşgunly tanslar, halk döredijilik kompozisiýalary, muzeý gymmatlyklarynyň, halk senetçiliginiň hem-de amaly-haşam sungatynyň önümleriniň sergisi çärä aýratyn öwüşgin berdi.

Çykyş edenler türkmenistanlylary ýokary hilli ýaşaýyş jaýy bilen üpjün etmegiň, durmuş derejesiniň yzygiderli ýokarlandyrylmagynyň hormatly Prezidentimiz Gurbanguly Berdimuhamedowyň alyp barýan durmuş ugurly syýasatynyň ileri tutulýan wezipeleriniň biri hökmünde kesgitlenendigini nygtadylar. Bu ýere ýygnananlar özenini adam hakyndaky alada düzýän düýpli özgertmeleriň amala aşyrylýandygy, Watanymyzyň gülläp ösmeginiň we abadançylygynyň bähbidine ýadawsyz işleri bitirýändigi üçin döwlet Baştutanymyza tüýs ýürekden hoşallyk bildirdiler.

Soňra, ýaşulularyň ak pata bermegi bilen, 4 gatly ýaşaýyş jaýynyň binýadyna pil bilen ilkinji beton garyndylary guýuldy. Bina şäheriň merkezinde welaýat keselleri anyklaýyş we maslahat beriş merkeziniň hem-de iň häzirki zaman Gaýragoýulmasyz «tiz kömek» merkeziniň ýakynynda gurlar. 48 hojalyga niýetlenen jaýyň giň otaglary, oňat enjamlaşdyrylan aşhanasy, giň eýwany bolar. Taslamada mümkinçilikleri çäkli adamlar üçin has amatly şertleriň döredilmegi göz öňünde tutuldy.

Ýaşaýyş jaýynyň howlusynda futbol, woleýbol, basketbol oýnamak üçin meýdançalar hem-de çagalaryň oýun meýdançalary gurnalar. Bu ýerde dynç almak üçin ýaşyl baglyklar ýerleşer, şu günki dabara gatnaşanlaryň oturdan ilkinji agaç nahallary ýetişer.