Köp kişi eýýäm öz öýünde arçajyklary bezedi. Oňa ýetişmedikler üçin ony milli ruhda bezemek teklip edilýär.
Maşgala firmasy - «Çapak« HJ türkmen çeperçilik ýörelgelerine kybap gelýän üýtgeşik arça bezegleriniň ençeme görnüşini teklip edýär. Aýazbabadyr Garpamygam edil oýnawaçlar ýaly gelşikliden özüne çekiji. Täze ýyl sowgatlaryny bolsa owadan sandyjyklara salaýmaly.
Şeýle üýtgeşik sowgatlyklar «Nusaý» myhmanhanasynyň ikinji gatynda ýerleşýän dükanda satylýar. Dükanyň eýesi Maýa Orazmyradowa çeper elli zenan. Onuň eline düşen islendik mata bölegi, edil jadylanan ýaly, gaýtalanmaz zada öwrülýär duruberýär. Gyzy hem ene kesbini ýöredýär. Olar ýüň we ýüpek ýüplükden ajaýyp eserleri dokaýarlar. Maşgalabaşy Muhammet Baýramow marketing boýunça menejerligi öz üstüne aldy.
Geljek 2020-nji ýyl ak syçan ýyly, şol sebäplem gelşiklije jandarjyklaryň şekili Maýa Hydyrownanyň we onuň gyzynyň hünäri bilen desmallara, ýassykdaşylara, halyçalara, käselerdir bulgurlaryň astyna goýulýanlara, çäýnege geýdirilýän topbulara we ş.m. salnypdyr. Elbetde, öý bikesi joralaryna we dogan – garyndaşlaryna bol-elinlik hem şatlyk getirýär diýlip yrym edilýän ýylyň nyşany çekilen desmaly täze ýyl desterhanynyň başyna ýygnananlara sowgat edende begense gerek.
Maýa Hydyrowna türkmen nakgaşlary bilen hyzmatdaşlygy hem ýola goýupdyr, şonuň üçinem onuň dükanyndan žiwopis eserlerini we hakyky daşlar oturdylan kümüş şaý-sepleri-de satyn alyp bolýar.
1992-nji ýylda döredilen «Çapak« HJ Türkmenistanyň Senagatçylar we telekeçiler birleşmesiniň agzasydyr. Maşgala üçlügine ýygy-ýygydan daşary ýurtlarda milli amaly-haşam sungatyna wekilçilik etmegi ynanýarlar. Mysal üçin, şu ýyl kompaniýa Täjigistanyň paýtagtynda geçirilen Merkezi Aziýa söwda forumyna gatnaşdy.
«Biziň wezipämiz –mähirli, täzeçil we göreniňden keýpiň göterilýän owadan zatlary döretmek. Galyberse-de, halk senediniň özboluşly usullarynda mähir siňdirilip ýasalan sowgatlyklar türkmen halkynyň gözbaşyny asyrlaryň jümmüşinden alyp gaýdýan çeper-estetik ýörelegeleri we köp ugurly bezegler tilsimleri bilen tanyşmaga mümkinçilik berýär» – diýip Maýa Hydyrowna gürrüň berýär.
