Maýa Kulyýewa adyndaky Türkmen milli konserwatoriýasynyň Kiçi zalynda D. Öwezow adyndaky sazçylyk mekdebiniň akkordeonçylar orkestri çykyş etdi. Onuň dirižýory saz mugallymy Astanguly Baýromowdyr.
Аstanguly — TMK-nyň ýanyndaky Ýöriteleşdirilen sazçylyk mekdep-internatynyň uçurymy. Ol soňra okuwyny Kazanyň döwlet konserwatoriýasynda dowam etdirdi. 2018-nji ýylda şol okuw jaýyny tamamlap, D. Öwezow adyndaky sazçylyk mekdebinde mugallymçylyk kärine başlady. Şol bir wagtda-da ol mekdepde okaýan 30 talypdan ybarat akkordeonçylar saz toparyny döretdi.
Akkordeonçylaryň çykyşy meşhur Şükür bagşynyň çalan sazlarynyň Astanguly Baýramow tarapyndan täzeden işlenen nusgalaryndan başlandy. Şol özüne çekiji äheňlerde türkmen tebigatynyň gözellikleriniň täsirini duýmak, taryhy wakalarynyň ýaňyny, şahyrlaryň waspyny ýetiren ýüwrük ahalteke bedewleriniň toýnaklarynyň dükürdisini eşitmek bolýar.
Şeýle hem bu çykyşda dürli ugurlara degişli saz eserleri ýerine ýetirildi. Pawel Tursunowyň «Таngosy», Joakkino Rossininiň «Sewil dellegi» operasyndan Figaronyň ariýasynyň sazy, Boris Weksleriň «Mоldawan heňleri», Aleksandr Borodiniň «Knýaz Igorь» operasyndan «Polowesleriň tanslarynyň» sazy.
Azerbaýjan kompozitory Gajy Hanmämmedowyň 2-nji «Tar we orkestr üçin konserti» diňleýjileriň ýadynda uzak wagt galan bolsa gerek. Halk saz gurallary bölüminiň ikinji ýyl talyby Aýmyrat Aýmyradowyň ýekelikde ýerine ýetiren parçalary köpleriň göwnüne ýarady. Çykyşdan soňra biz Aýmyratdan: — Näme üçin Siz beýle täsin saz guralyny saýlap aldyňyz? – diýip soradyk.
Ol: — Tar – bu plektorly dutar – diýip jogap berdi. — Milli saz gurallaryň arasynda labyzly owazy üçin ol barha köpçülige ýaýraýar. Ençeme ýyllardan bäri ony çalyp ýöremsoň, oňa halys öwrenişipdirin, tüýs ýüregimden onuň bendiwany. Elbetde meniň işimde sähelçe-de üstünlik bar bolsa, ol gürrüňsiz halypamyň irginsiz çeken zähmetiniň miwesidir.
Edil şol pursatda Aýmyrat baş egip, ajaýyp gül çemenini Altyn Rustamowa sowgat berdi.
— Аýmyrat zehinli — diýip, onuň mugallymy gürrüňe goşuldy. – Mekdebe ilki geläýende-de, onuň saza çäksiz höwesi daşyndan duýulýardy. Biz ýakyn wagtlarda Aýmyrat Aýmyradowyň milli saz gurallary orkestri bilen bilelikdäki çykyşyny guramagy meýilleşdirýäris.
Biz Aýmyrada üstünlikleri arzuw edýäris!
Таmara GLAZUNOWA
Suraty: Ýuriý ŞKURINIŇKI
