Şenbe gününiň  säher çaglarynda  paýtagtymyz Aşgabadyň “Altyn Asyr” söwda merkezine gelen alyjylara täze modaly lybaslar görkezildi. Bu  tanyşdyryş tomaşasy olarda ýakymly täsir galdyrdy. Aşgabatlylaryň we paýtagtyň myhmanlarynyň  döwrebap geýimleri satyn almak üçin  gelýän iki gatly “Altyn Asyr” söwda merkezi hemişe köp adamly. Şenbe güni  bu ýerde Aşgabadyň 140 ýyllygyna gabatlanyp modalaryň hakyky “mahabattlandyryş görkezilişi”  geçirildi.   

Onda Türkmenistanyň dokma ministrliginiň we “Mähirli zenan” hususy moda öýüniň dizaýnerleriniň dürli stilde  taýýarlan lybaslary görkezildi.

Täze modalar sergisinde  zenanlaryň gündelik we baýramçylyk dabaralarynda geýmäge höwes edýän  lybaslary, kaşaň eşikleri söýýän kiçi ýaşlylaryň eşikleri hem-de  erkek kişileriň penjekleridir jalbarlary-da görkezildi. Türkmen  dizaýnerleriniň we tikinçileriniň  täzeçe biçüwlerde we ölçeglerde  taýýarlan lybaslarynda  reňkleriň dürli öwuşginleri utgaşykly sazlaşdyrylypdyr. Şunuň ýaly-da akssesuarlar –olaryň üstüni ýetirýän serenjamlar hem köplügi we dürli-dürlidigi bilen tapawutlanýar. 

Aýal-gyzlara we erkek kişilere  möwsüme laýyklykda hödürlenýän hünjüdir  we tomagalar bilen bezelen,  ýeňleri we boýlary boldan, giňden  biçilen ýeňil geýimler! Eýsem-de bolsa, bu täzelikleriň ählisini  milli medeniýete we döwrebap stile kybapdaşlyk birleşdirýär. Hünjüleriň keşdepisint bezelşinde türkmen nagyşlarynyň nusgalary göze ilýär, hat-da “kebelek” diýilýän erkek galstugy-da milli däpleri göz öňünde tutulyp ýerine ýetirilipdir.

Bu ýere Gündogaryň gözelligini synlamaga  gelen Amerikanyň Birleşen Ştatlarynyň Türkmenistandaky ilçisi Mettýu Klimou-da şenbe günündäki milli moda görkezilişine ýokary baha berdi.

Swetlana ÇIRSOWA
Suratçy: Ýuriý ŞKURIN