Türkmeistanyň Bilim ministrliginiň goldawy bilen Halkara ynsanperwer ylymlary we ösüş uniwersiteti (HYYÖU) tarapyndan ýurduň ýokary okuw mekdepleriniň talyplarynyň arasynda geçirilen iki tapgyrdan ybarat döredijilik bäsleşiginiň netijeleri jemlendi.

Türkmen paýtagtynyň 140 ýyllygyna gabatlanan esse we çeper fotografiýa boýunça bäsleşikleri  bu ýokary okuw jaýynyň žurnalistika kafedrasy gurady. HYYÖU-nyň elektron poçtasyna paýtagtda we welaýatlarda ýerleşýän 14 ýokary okuw jaýyndan onlarça işler gelip gowuşdy.  

Esse bäsleşigi iňlis dilinde geçirildi. Onda Altyn Orazberdiýewa (HYYÖU), Oguljemal Amansähedowa (S. Seýdi adyndaky TDMI, Türkmenabat ş.) we Baýnazar Nepesow (DIM-iň Halkara gatnaşyklar instituty) dagylar ýeňiji boldular. Talyp işleri paýtagtyň durmuşy barada köptaraply kyssa görnüşinde bolup, esasan şeýle talaplara: çeper pikiriň özboluşlylygyna, tematik mazmunlylyga,  gysgalyga we göwrümlilige doly laýyk gelýärler.   

5 sany ikinji, 8 sany üçünji ýer guramaçy okuw jaýynyň, Magtymguly adyndaky TDU-nyň, Maýa Kulyýewa adyndaky Milli konserwatoriýanyň, S. Seýdi adyndaky TDMI-niň, Ykdysadyýet we dolandyryş institutynyň, Oba hojalyk uniwersitetiniň, Maliýe institutynyň, Medeniýet institutynyň, DIM-iň Halkara gatnaşyklary institutynyň, Telekommunikasuiýa we informatika institutynyň, Inžener-tehniki we ulag kommunikasiýalary institutynyň talyplaryna berildi. 

Aşgabadyň keşbiniň fotografiýa sungatynda iň çeper beýany üçin birinji ýere iki talyp: Näzli Ýagşymyradowa (HYYÖU) we Baýnazar Nepesow (DIM-iň Halkara gatnaşyklary instituty) mynasyp boldy.  

Hormat sekisiniň ikinji paýasyny Toýly Muhammetdurdyýew (TDU) we Atajan Kämiljanow (Türkmenistanyň energetika instituty, Mary şäheri) eýeledi.

Üçünji ýere Döwlet Heşdekowyň (Bedenterbiýe we sport instituty) we Hurma Çaryýewanyň (Telekommunikasiýa we informatika instituty) fotosýužetleri mynasyp boldy.  

Anastasiýa KASÝANOWA

Bäsleşigiň baýrakçylarynyň suratlary