Oba hojalygy we daşky gurşawy goramak ministrliginiň Gidrometeorologiýa gullugynyň deslapky çaklamalaryna görä, noýabr aýynyň başynda Türkmenistanda şemally we salkyn howa bolar. Hepdäniň ortalaryndan howanyň esli derejede sowamagyna garaşylýar.

Aşgabatda howanyň temperaturasy gündizine + 16 ... + 18°, gijesine ortaça +10-dan –1...+3° derejä çenli üýtgär. Çarşenbe güni, 3-nji noýabrda, Ahal welaýatynda-da ýagyş ýagar diýlip çaklanylýar, ol ýerde hepdäniň başynda termometr gündizine +15 ... + 20°C bolar, gijesine bolsa +6 ... + 11°-dan başlap, –3 ... + 2°C çenli sowap biler.

Balkan welaýatynda üýtgäp durýan bulutly, howanyň temperaturasy gijesine +7 ... + 12°-dan -2 ... + 3° çenli üýtgär, gündizine +18 ... + 23°C bolar, ýagyş ýagmagy ähtimal. Kenarýaka sebitlerinde ortaça temperatura + 5 ... + 10° bolar.

Mary welaýatynda maýyl we gurak howa bolar, temperatura gündizine + 19 ... + 24°. Emma hepdäniň ortalaryna bu görkezijiler gündizine +1...+ 6°-a, gijelerine –3 ...+ 2° çenli üýtgär. Ýagyş ýagmagy ähtimal.

Lebap welaýatynda hepdäniň ortalarynda howanyň temperaturasynyň ep-esli peselmegine we ýagyş ýagmagyna garaşylýar. Temperatura gündizine +17 ...+ 22 °-dan 0 ... + 5°-a, gijesine –4 ... + 1°-a çenli aşaklap biler.

Daşoguz welaýatynda salkyn we bulutly, ortaça temperatura gündizine + 12 ... + 17°-dan 0 ... + 5°-a, gijesine –4 ... + 1°-a çenli peseler.

Salkyn güýz günlerinde arassa howada gezim etmegiň adam bedenine oňyn täsir edýändigi, öýkeniň işleýşini we bedende gan aýlanyşyny gowulaşdyrýandygy subut edilendir. Aýratynam, seýilgähde, tokaýda ýa-da botanika bagynda agaçlaryň arasynda gezmek peýdalydyr. Pasla görä geýinmekligi hem unutmaň! 

 Taýýarlan Swetlana Çirsowa