Her bir ynsan ýaşlygyndan öz öňünde belent maksat goýýar we çagalykdan şonuň arzuwynda gezýär. Kimler kino aktýory, kim aýdymçy, kimler bolsa sahna eserlerini goýujy ýa-da çeper filimleri dörediji režisiýor bolmagy arzuw edýär. Köpler şol arzuwlaryna hem ýetýärler.

Şonuň ýaly sahna ussatlarynyň biri hem Türkmenistanyň at gazanan artisti Döwletgeldi Berdiýewdir. Ol Magtymguly adyndaky milli sazly-drama teatrynyň sahna ussady hökmünde tanalyp, hemişe dürli häsiýetlerdäki keşpleri janlandyryp gelýär.

Ata-babalarymyzyň «Ata dünýäsi ogla gönezlik» diýşi ýaly Döwletgeldiniň saýlan ýolunda kakasy — Türkmenistanyň halk artisti Çary Berdiýewiň maslahatlary ony kämillige atardy. Döwletgeldi: «Kakam maňa kiçiligimden çeýe, çalasyn bolmagy ündeýärdi» – diýip belläp geçýär.

Häzirki wagtda Döwletgeldi Berdiýewiň režisýorlyk etmeginde «Teatr» atly köp bölümden ybarat telefilm surata düşürilýär. Bu filmde Magtymguly adyndaky milli sazly-drama teatrynyň sahna ussatlary ̶ Türkmenistanyň halk artistleri Öwez Gelenow, Halbike Dowyýewa, Türkmenistanyň at gazanan artisti Tirkiş Mätnazarow we ýaş artistler surata düşýärler.