Magtymguly adyndaky türkmen milli sazly-drama teatrynda Türkmenistanyň sungatda at gazanan işgäri, kompozitor Suhan Tüýliýewiň döredijilik agşamy geçirildi. Bu ýere kompozitoryň ýakynlary we dogan-garyndaşlary, onuň üýtgeşik zehinine sarpa goýýan köpsanly adamlar, Maýa Kulyýewa adyndaky Türkmen milli konserwatoriýasynyň mugallymlary hem-de talyplary ýygnanadylar, şolaryň arasynda Suhan Tüýliýewiň şägirtleri we onuň ýoluna eýerijiler bar.
Döredijilik agşamy konserwatoriýanyň horunyň we simfoniki orkestriniň Magtymgulynyň sözlerine ýazylan «Türkmen binasy» diýen meşhur eseriniň ýerine ýetirmeginde ýaňlanan dabaraly mukam bilen açyldy. Iki horuň hem-de tenor sesli aýdymçy Röwşen Baýramowyň çykyşlary dabaraly mukam bilen sazlaşykly utgaşdy. «Türkmen binasy»-nyň ýerine ýetirilmegi diňleýjilerde belent watançylyk duýgularyny döretdi.
Soňra Suhan Tüýliýewiň ýerine ýetirilen «Pendi nagmalary», «Ezizim» diýen we beýleki eserleri diňleýjilere türkmen topragynyň ertekilerdäki ýaly ajaýypdygy barada gürrüň berdi. Şunuň bilen baglylykda görkezilen wideoşekillerde Hazaryň tolkunlarynyň üstünden uçup göçýän guşlaryň uçuşy, goýny al-ýaşyl güläleklere beslenen aňyrsy görünmeýän sähralyklar, dag çeşmeleriniň şildiräp akýan suwy, köpürjikli dag şarlawuklary beýan edildi, suratkeşleriň eserlerinde şekillendirilen türkmen zenanlarynyň gözelligi aýratyn orun eýeledi. Kompozitoryň häsiýetine mahsus ýaňlanan asuda, mylaýym saz biziň daşymyzy gurşap alýan dünýämiziň päkligini hem-de ruhubelentligini wasp etdi.
Konsert A.Atabaýewiň sözlerine döredilen «Döwletli Döwran geldi» diýen meşhur kontatanyň ýaňlanmagy bilen tamamlandy. Ol ýerine ýetirilende simfoniki orkestre horuň hem-de aýdymçy Röwşen Baýramowyň çykyşlary, şeýle hem gargy tüýdügiň (Wepa Ödäýew) we gopuzyň (Baýramgül Ahmedowa) owazy goşuldy. Bu saz eseri ýaňlananda, zalyň içi, konsertiň açylyşynda bolşy ýaly, ýene-de joşgunly dabaraly owaza doldy.
Bir gezek Suhan Tüýliýew «AA»-yň habarçylary bilen söhbetdeş bolanda, öz halypasy Weli Muhatowyň: «Siz aslyňyz gadymdan gelýän sazanda bolmalysyňyz. Siziň sazyňyz islendik ýerde – Amerikada, Afrikada, ýa-da Demirgazyk ýarym şarynda ýaňlansa-da, türkmen sazy bolmalydyr» diýip, aýdan nesihatyny ýatlady. Suhan Tüýliýewiň özi hem we onuň şägirtleri-de döredijiliginde şu ýörelgä eýerýärler. Şu günki döredijilik agşamy diňleýjilere Suhan Tüýliýewiň ýüreginden syzlyp dörän ajaýyp türkmen sazlaryny bagyş etdi.
