Türkmenistanyň Döwlet medeniýet merkeziniň Mukamlar köşgünde Türkmenistanyň Döwlet simfoniki orkestriniň «Multfilmleriň simfoniki meşhur aýdym-sazlary» konserti geçirildi. Konsertiň diňleýjileriniň aglabasy ýaşajyk saz muşdaklaryndan ybarat boldy.

Konsertde aýdymçylar Maýsa Nyýazowa bilen Döran Şammyýew multfilmleriň gahrymanlarynyň aýdymlaryny ýerine ýetirmek bilen, Tarzanyň, şazada gyz Guwuň, gülgüne babyryň, Aladdiniň, «Suw perijiginden» Ursulanyň keşplerini-de döretdiler.

Konsertiň dowamynda Resul Gylyjowyň ýolbaşçylygyndaky Döwlet simfoniki orkestriniň ýerine ýetirmeginde Li Harliniň, Alan Menkeniň, Metýu Wilderiň, Genri Mançininiň, Kresten Anderson Lopesiň we Robert Lopesiň, Mihael Joakkinonyň we başga-da ençeme kompozitorlaryň eserleri ýaňlandy.

Belli multfilmlerden parçalar uly-kiçi tomaşaçylaryň ählisiniň ünsüni özüne çekdi.

Döwlet simfoniki orkestri «Multfilmleriň simfoniki meşhur aýdym-sazlary» konserti bilen konsert möwsümini tamamlady.