Aşgabatda Türkmenistanyň Bütindünýä Söwda Guramasyna goşulmagynyň netijelerine bagyşlanan tegelek stol geçirildi.
Çärä Türkmenistanyň ministrlikleriniň we pudakalýyn dolandyryş edaralarynyň işgärleri, Senagatçylar we telekeçiler birleşmesiniň agzalary,şeýle hem KHBS-niň wekilleri gatnaşdylar. Beýleki aýry-aýry ýurtlaryň mysalynda Bütindünýä Söwda Guramasyna goşulmagyň we kabul edilmeginiň düzgünleri bilen tanşan çärä gatnaşanlar bu ugurdan bar bolan ylalaşyklara garadylar.
BSG-niň Buenos-Aýresde geçirilen 11-nji ministrler maslahatynda gurama agza 118 ýurduň Söwda ulgamynda zenanlaryň hukuklaryny we mümkinçiliklerini giňeltmek barada Jarnama gol çekendiklerini bellemek gerek. Resminama zenanlaryň söwda gatnaşygyny artdyrmak maksady bilen BSG-niň gurallaryny beýan edýär. Jarnamada görkezilen işler zenanlar üçin has köp iş orunlaryny döretmäge, ahyr netijede – ykdysady ösüşi höweslendirmäge gönükdirilendir.
Bütindünýä Söwda Guramasy dünýä söwdasynyň ählumumy meselelerini we ösüş geljegini ara alyp maslahatlaşmak üçin meýdançadyr. BSG-niň söwda ulgamy erkin söwda ýörelgelerine ynam döretmekde we we ony berkitmekde möhüm ähmiýete eýedir. Döredilen döwründen bäri BSG telekommunikasiýalar, maglumat-tehnologiýalary we maliýe hyzmatlary pudagynda bazarlary açmak barada şowly gepleşikler üçin forum bolup hyzmat edip gelýär.