«Mary deri-aýakgap» açyk görnüşli paýdarlar jemgyýeti ýurdumyzyň telekeçileriniň sargytlary boýunça taýýarlanan çaga eşikleriniň ilkinji tapgyryny sarp edijilere ugratdy. Ýokary hilli matalardan gelşikli biçüwde tikilen dürli ýaşly mekdep okuwçylaryna niýetlenen jalbarlar, köýnekler, penjekler we kurtkalar kärhanada işe goýberilen täze tikinçilik bölümiň ilkinji önümleridir. Germaniýada we Ýaponiýada öndürilen ýokary öndürijilikli we kämil tikin maşynlary oturdylan bu bölümde taýýarlyk okuwlarynda hünäri kemsiz ele alan gyz-gelinleriň 20-den gowragy işe başladylar. Sargyt edilen tikin maşynlarynyň täze tapgyrynyň ornaşdyrylmagy bilen ýakyn wagtda bölüm 2 esse giňeler.
2020-nji ýylda Marynyň öňki gön zawodynyň binýadynda Türkmenistanyň Prezidentiniň Karary esasynda döredilen «Mary deri-aýakgap» açyk görnüşli paýdarlar jemgyýetiniň iki ýyllyk tejribesi ýurdumyzda önümçilik kärhanalaryny hususylaşdyrmaklyga alnan ugruň bähbitlerini aýdyň görkezýär. Paýdarlar jemgyýeti döredilmänkä bu könelişen önümçilikde 100 çemesi adam zähmet çeken bolsa, häzir işgärleriň sany 300-den geçdi. Öndürilýän önümleriň hili, görnüşleri we möçberi üznüksiz ýokarlanýar.
Ýurdumyzyň maldarçylyk pudagynyň ýerli tebigy aýratynlygy bilen tapawutlanýan dürli deri önümlerinden gön işläp bejermek kärhananyň esasy ugry bolmaklygynda galýar. Döredilen gününden bäri bu paýdarlar jemgyýetinde 23 million 860 müň inedördül desimetr ýokary hilli gön öndürildi. Gön önümleriniň esasy bölegi «Türkmen kalkan» bilelikdäli kärhanasyna we Balkan welaýatynyň Magtymguly etrabyndaky tikin we aýakgap fabrikler toplumyna ugradylýar, galan bölegi bolsa kärhananyň öz önümçiligi üçin çig mal hökmünde sarp edilýär.
Şu paýdarlar jemgyýetiniň esaslandyryjylarynyň biri bolan «Röwşen aýakgaplary» hususy kärhanasynyň tejribeli hünärmenleriniň ýakyn goldawy bilen açylan täze tikinçilik bölüminde ýurdumyzyň okuwçylary üçin aýakgaplar öndürmeklik geçen ýyl ýola goýlupdy. Şondan bäri mekdep ýaşly oglan-gyzlar üçin dürli pasyllara niýetlenip tikilýän aýaga ýakymly, berk, bahasy elýeterli şeýle aýakgaplaryň 80 müň jübütden gowragy ýerleşdirildi.
