«Türkmennebit» döwlet konserniniň Balkan welaýatyndaky «Nebitgazburawlaýyş» kärhanasynyň ussat burawlaýjylary şu ýylyň geçen ilkinji çärýeginde täze guýularyň altysyny gazyp, nebitgaz çykaryjylara ulanmaga berdiler.

Şeýle-de, «Goturdepe» buraw işleri müdirliginiň burawlaýjylary şu ýylyň geçen üç aýynda Goturdepe käninde 12 kilometrden gowrak ýerasty çuňluk geçmegi başardylar.

Ýeri gelende aýtsak, Demirgazyk Goturdepe känindäki 390-njy we 231-nji guýulary nebitçilere ulanyşa tabşyran burawlaýjylar ýakynda Goturdepe käninde taslama çuňlugy 2,6 kilometr bolan 1807-nji guýynyň gazuw işlerini-de üstünlikli tamamladylar. Şeýlelikde, bu guýynyň 2,535 kilometr çuňlugyndan ýangyç çig malynyň senagat akymy alyndy.

Täze guýy tehniki-sazlaýyş işlerinden soň, «Goturdepenebit» nebitgazçykaryş müdirliginiň nebitçilerine ulanyşa berildi. Guýy bir gije-gündizde 12 tonnadan gowrak «gara altyn» berýär. Şeýle deslapky netijeler bolsa «Türkmenistanda nebitgaz senagatyny ösdürmegiň 2030-njy ýyla çenli döwür üçin Maksatnamasyndan» ugur alyp, üstümizdäki ýylyň her bir gününi şanly görkezijilere besleýän kärhanalaryň Günbatar sebitde barha artýandygyna şaýatlyk edýär.