Şu günler Daşoguz welaýatynyň ekin meýdanlarynda ýetişdirilýän ýokary hasylly galla görnüşleriniň arasynda bugdaýyň ösüş döwri sebit üçin amatly bolan «Alekseýewiç» we «Bezostaýa-100» görnüşleri bar.

Olar geçen güýzde ýerli toprakda we howa şertlerinde özüni gowy görkezen beýleki görnüşler bilen bir hatarda birnäçe etraplarda ýeterlik mukdarda ekildi. Ondan öň bu täze görnüşler tejribe meýdançalarynda deslapky synaglardan geçip, hasyllylyk, guraklyga çydamlylyk, dökülmä we galla ekinleriniň dürli kesellerine durnuklylyk nukdaýnazaryndan baha berlende, gowy netijeleri görkezipdi.

Hünärmenleriň bellemegine görä, bu görnüşler seçip alyş görkezijileri taýdan welaýatda giňişleýin ösdürip ýetişdirmek üçin ýaramlydyr. Olara ýatma, sümmülinde zaýalanma, dürli kesellere we durnuksyz howa şertlerine durnuklylyk, ýokary hasyllylyk we köp unlulyk mahsusdyr.

Häzirki wagtda Daşoguz welaýatynyň gallaçylary bugdaýyň «Sähraýy», «Juwan», «Berkarar», «Garaşsyzlyk» ýaly we başga-da köp görnüşlerini üstünlikli ösdürip ýetişdirmegi öwrendiler. Şol bir wagtyň özünde, ýerli howa şertlerinde ýokary we durnukly hasyl bermäge ukyply täze bugdaý görnüşlerini döretmek we oýlap tapmak üçin, sebitde seçip alyş işleri giňişleýin işjeň dowam etdirilýär.