Türkmenistan we Niderlandlar Patyşalygy Türkmenistanyň çäginde lokalizasiýa, bilelikdäki gurluşyk we dizaýn pudagynda hyzmatdaşlyk eder.

Degişli ylalaşyk «Balkan» gämigurluşyk we gämi abatlaýyş zawodynyň baş müdiriniň orunbasarynyň Niderlandlar Patyşalygyna sapary wagtynda De Klop B.V kompaniýasynyň paýdarlary bilen geçirilen duşuşykda gazanyldy. Bu kompaniýa deňziň düýbüni çuňaldyjy gämileriň we läbik sorujylaryň öňdebaryjy öndürijisidir.

Duşuşyk Slidreht şäherindäki «Baggermuseum» muzeýinde geçirildi. Taraplar, şeýle hem «Balkan» gämigurluşyk we abatlaýyş zawodynda deňziň düýbüni çuňaldyjy esasy enjamlaryny we mehanizmlerini abatlamak boýunça türkmen hünärmenleri üçin tehniki we amaly okuw geçirmek barada ylalaşdylar.

De Klop B.V. kompaniýasynyň wekilleri hem öz gezeginde, deňziň düýbüni çuňaldyjylaryň gurluşygynyň we abatlanylmagynyň ähli ugurlarynda bilelikde işlemäge taýýardyklaryny mälim etdiler. Şunuň bilen baglylykda tehniki we baha teklipleri işlenip düzüler.

Adaty deňziň düýbüni çuňaldyjylardan başga-da De Klop B.V. elektrik deňziň düýbüni çuňaldyjylary üçin hem taslama hödürledi. Bu çözgüt elektrik energiýasynyň arzan bahasyny göz öňünde tutup, Türkmenistan üçin has möhüm bolup biler.

«Balkan» gämigurluşyk we abatlaýyş zawodynyň baş müdiriniň orunbasary Dredge Yard B.V. we Dredging Service Europe kompaniýalarynyň wekilleri bilen hem gepleşikleri geçirdi. Bu kärhananyň wekilleri Hazar deňzinde, şeýle hem Türkmenistanyň içerki suwlarynda gazuw işlerine gatnaşmaga gyzyklanma bildirdiler.

Bu kärhanalar bilen hyzmatdaşlyk Türkmenistana gämigurluşyk pudagyny döwrebaplaşdyrmaga, hünärmenleriň hünärlerini ýokarlandyrmaga we gazuw işleriniň hilini ýokarlandyrmaga mümkinçilik berer.