Halkara ynsanperwer ylymlary we ösüş uniwersiteti ýurduň mekdepleriniň ýokary synp okuwçylaryny hem-de uçurymlaryny «Men – geljekki hünärmen» diýen integrirlenen olimpiada gatnaşmaga çagyrýar.
Bäsleşige Türkmenistanyň umumy bilim berýän orta mekdepleriniň 12-nji synp okuwçylary we orta mekdebi tamamlanyna 1 ýyldan köp wagt bolmadyk ýaş raýatlar gatnaşyp bilýärler. Gatnaşjaklary bellige almak 10-njy marta çenli dowam eder.
Olimpiada 15-nji martdan 15-nji maýa çenli döwürde bäş ugur: matematika, informatika, iňlis dili, jemgyýeti öwreniş hem-de Türkmenistanyň taryhy boýunça geçiriler. Olimpiada şahsy bäsleşik görnüşde geçirilip, üç tapgyry özünde jemleýär.
Birinji saýlama hem-de ikinji tapgyrlar ýokary okuw mekdebi tarapyndan onlaýn görnüşde guralar. Olimpiadanyň birinji we ikinji tapgyrlarynyň jemleri boýunça iň oňat netijeleri görkezen gatnaşyjylar üçünji, jemleýji tapgyra gatnaşmak üçin Halkara ynsanperwer ylymlary we ösüş uniwersitetine çagyrylar.
Uniwersitetiň saýtynda, şeýle hem +99312 398513; +99312398550 telefon belgiler we iuhdolympiads@gmail.com elektron salgy boýunça giňişleýin maglumatlary alyp bolar.
Intellektual bäsleşikleriň geçirilmegi ýaşlara öz ukyplaryny ýüze çykarmaga, dersler boýunça bilimlerini hem-de taýýarlyklaryny görkezmäge ajaýyp mümkinçilik berer.
Integrirlenen olimpiada ukyp-başarnykly, zehinli ýaşlary ýüze çykarmak, takyk we durmuş-ynsanperwer ylymlaryny öwrenmäge gyzyklanmany höweslendirmek, häzirkizaman sanly tehnologiýalary ulanmak arkaly özbaşdak işläp bilmek başarnyklaryny kemala getirmek we ösdürmek, şeýle hem maglumat-kommunikasiýa tehnologiýalarynyň üsti bilen ýurduň ýokary okuw mekdepleriniň we orta mekdepleriniň özara gatnaşyklaryny pugtalandyrmak maksady bilen guralýar.
