Türkmenistanyň Daşary işler ministrliginiň Halkara gatnaşyklary institutynda «Ýokary bilimde sanlylaşdyrmak, IT we emeli aň» diýen tema boýunça bilim ulgamyna STEM tehnologiýasyny ulanmak boýunça okuw maslahaty geçirildi. Okuw maslahaty Nýu-Ýork tehnologik institutyndan pedagogik ylymlaryň doktory, «Fulbright» halkara maksatnamasynyň hünärmeni Melda Ýyldyz geçirdi.

Çärä institutyň talyplary we mugallymlary, okuw işini sanlylaşdyrmak, bilime, sanly okuw serişdelere hem-de bilim tehnologiýalaryna emeli aňy ornaşdyrmak meseleleri boýunça jogapkärler gatnaşdylar. 

STEM (Science, Technology, Engineering, Mathematics) – 2000-nji ýyllaryň başynda ABŞ-nyň Milli ylym gaznasynyň alymlarynyň başlangyjy boýunça dörän bilim nusgasy. STEM-iň esasynda ylmy, tehniki, inženerçilik we matematika dersleriniň utgaşdyrylmagy hem-de talyplaryň wajyp tehnologik wezipeleri çözüp bilmek, tankydy pikirleniş, döredijilik we hyzmatdaşlyk etmek başarnyklaryny giňeltmek üçin biri-biri bilen özara baglanyşyklykda olaryň okadylmagy durýar. 

Okuw maslahatynyň dowamynda bellenilişi ýaly, STEM-çemeleşme talyplarda esasy hünär ukyplaryny döretmäge, tehnologik taýdan sowatlylygy hem-de döwrebap tehnologiýalar bilen işlemegi başarmagy kemala getirmäge mümkinçilik berýär. Bu bolsa häzirki zamanyň barha okgunly ösýän dünýäsinde iş wezipeleriň geljekde üstünlikli guralmagynda möhümdir.

Geçirilen okuw maslahaty köp babatda oňa gatnaşyjylaryň gymmatly bilimleri almagyna, olaryň dünýägaraýşynyň giňemegine, innowasion tehnologiýalary dolandyrmak başarnyklaryny özleşdirmäge hem-de ýaş hünärmenleriň maksadaokgunlylygyny artdyrmaga ýardam etdi.

Okuw maslahatyndan soň myhman üçin institut boýunça tanyşlyk gezelenji guralyp, «Türkmen diplomatiýasynyň taryhy» muzeýine, ÝUNESKO-nyň «Parahatçylyk medeniýeti» klubuna, Okuw studiýasyna hem-de ýokary okuw mekdebiň «Parahatçylygyň ýaş çaparlary» diýen taslamasy üçin gurnalan «Türkmeniň ak öýüne» barlyp görüldi.