Türkmenistandaky Fransuz instituty fransuz diline erk etmek derejesini ýokarlandyrmaga gyzyklanma bildirýän hemme diňleýjiler üçin ýöriteleşdirilen okuwlaryň tapgyrlaryny açýandygyny yglan etdi.

Yzygiderli okuwlar 2 – 31-nji maý aralygynda institutyň tejribeli mugallymlarynyň ýolbaşçylygynda geçiriler. Okuwlara gatnaşjaklary bellige almak 28-nji aprele çenli 14:00-dan 19:00-a çenli amala aşyrylýar. Orunlaryň sany çäklidir.

Fransuz diliniň ýöriteleşdirilen okuwlary taýýarlygyň dürli derejelerine hem-de okamagyň maksatlaryna laýyk gelýän maksatnamalaryň esasynda gurnalandyr. Okuwlar talyplara grammatika bilimlerini gowulandyrmaga, kommunikatiw başarnyklaryny ösdürmäge, dilden sözleýşi kämilleşdirmäge we şonuň bilen birlikde-de, öňde goýlan maksatlara ýetmäge hem-de fransuz dilinde gepleşilende özüňi ynamly duýmaga kömek eder.

Gysga möhletli okuwlar taýýarlygyň bäş ugurlaryny hödürleýär: gepleşmek başarnyklaryny ösdürmek boýunça sapaklar (A2-B1); geplenilýän fransuz dili (B2- C1); fonetika boýunça sapaklar (A1-B1); ýetginjekler üçin edebiýat gurnagy (A2-B1) we çuňlaşdyrylan grammatika (B1-B2).

Her ugur 20 sagat okuwy öz içine alýar, bu bolsa sapaklaryň çuňňur we tapgyrlaýyn özleşdirilmegini üpjün edýär.

Türkmenistandaky Fransuz instituty bilim başlangyjy ilkibaşky taýýarlygyna garamazdan, fransuz diline erk ediş derejesini ýokarlandyrmak isleýänleriň ählisine kömek etmäge gönükdirilendir.

Guramaçylar geçiriljek okuwlaryň ilkinji gezek başlaýanlardan we ösenlerden başlap, fransuz dilini hem-de Fransiýanyň medeniýetini öwrenmek bilen meşgullanýanlara çenli örän köp diňleýjiler üçin gyzykly we peýdaly boljakdygyna ynam bildirýärler.

36-83-70, 36-83-71, 36-83-72 telefon belgilere jaň edip hem-de ift.secretaire@gmail.com elektron salgy boýunça okuwlara ýazylyp we goşmaça maglumatlary alyp bolar. Türkmenistandaky Fransuz institutynyň salgysy: Aşgabat şäheri, Aga Garryýew köçesiniň 69-njy jaýy.