Ýagşygeldi Kakaýew adyndaky Halkara nebit we gaz uniwersitetinde ýurdumyzyň orta mekdeplerinde bilim alýan 11 – 12-nji synp okuwçylaryň arasynda matematika, himiýa we informatika boýunça ders bäsleşiginiň jemleýji tapgyry geçirildi.

Bäsleşik aýratyn ýaryş görnüşinde geçirilip, ol iki tapgyrdan ybarat boldy. Birinji onlaýn tapgyrda Aşgabat we Arkadag şäherinden, şeýle-de ýurdumyzyň ähli welaýatlaryndan 695 okuwçy gatnaşdy.

Birinji tapgyryň netijeleri boýunça 189 sany zehinli okuwçy 25-nji aprelde Ýagşygeldi Kakaýew adyndaky Halkara nebit we gaz uniwersitetinde geçirilen ikinji jemleýji tapgyra gatnaşmaga hukuk gazandy.

Ýurdumyzyň dürli künjeginden gelen okuwçylar uniwersitetiň fakultetleri, kafedralary, okuw binasy, ylmy barlaghanalary, muzeýler we sport toplumlary bilen tanyşdyryldy.

Bu bäsleşikde matematika, himiýa we informatika dersleri boýunça uniwersitetde orta mekdep maksatnamasynyň esasynda guramaçy topar tarapyndan döredilen ýumuşlar hödürlendi.

Ballaryň jemi boýunça emin agzalary tarapyndan ýeňijiler belli edildi we olara uniwersitetiň adyndan I, II we III derejeli diplomlar gowşuryldy. Ýokary netijeleri görkezen okuwçylara mekdebi tamamlanlaryndan soňra bilimlerini uniwersitetde dowam etdirmek teklip edildi.

Ders bäsleşikleri zehinli ýaşlary ýüze çykarmak, okuwçylaryň hünär derejesini bilmek, ösüp gelýän bilimli, kämil nesli terbiýelemek, ýetginjeklerde ylyma bolan höwes döretmek, bilim ulgamyna innowasiýa girizmek ýaly maksatlar bilen geçirildi.